ବୋଲଗଡ: ବୋଲଗଡ଼ ଥାନା ନିକଟସ୍ଥ ୫୭ନଂ ଜାତୀୟ ରାଜପଥ ହିନ୍ଦୁସ୍ତାନ ପେଟ୍ରୋଲ ପମ୍ପର ଅନତି ଦୂରରେ ଏକ ପାରାମିଲିଟାରୀ ଗାଡ଼ି ମଙ୍ଗଳବାର ଭାରସାମ୍ୟ ହରାଇ ରାସ୍ତା କଡ଼ ବିଲ ମଧ୍ୟକୁ ଖସି ପଡିଛି। ସୂଚନା ଅନୁଯାୟୀ, ଗାଡି ଚାଳକଙ୍କ ଆଖି ଲାଗିଯିବା ଯୋଗୁ ଏହିପରି ଦୁର୍ଘଟଣା ଘଟିଛି। ସୌଭାଗ୍ୟବଶତଃ ଗାଡ଼ିରେ ଯାଉଥିବା ୮ଜଣ ଯବାନ ଅଳ୍ପକେ ବର୍ତ୍ତି ଯାଇଛନ୍ତି।
ସୂଚନାଯୋଗ୍ୟ, ଛତିଶଗଡ଼ ରାଜ୍ୟର ଗାଡି ଓଡ଼ିଶା ରାଜ୍ୟ ବାଟାଲିୟନରୁ ଛତିଶଗଡ଼ ରାଜ୍ୟକୁ ଫୋର୍ସମାନଙ୍କ ସହିତ ଜରୁରିକାଳୀନ ଆସବାବପତ୍ର ବହନ କରି ଓଡ଼ିଶାରୁ ଛତିଶଗଡ଼ ଯାଉଥିଲା। ଦୁର୍ଘଟଣା ଘଟିବା ପରେ ସାମାନ୍ୟ ଆହତ ହୋଇଥିବା ଯବାନଙ୍କୁ ସ୍ଥାନୀୟ ଅଗ୍ନିଶମ ବିଭାଗ କର୍ମଚାରୀମାନେ ଉଦ୍ଧାର କରି ବୋଲଗଡ଼ ଗୋଷ୍ଠି ସ୍ଵାସ୍ଥ୍ୟକେନ୍ଦ୍ରରେ ଚିକିତ୍ସା ନିମନ୍ତେ ଭର୍ତ୍ତି କରିଥିଲେ। ଚିକିତ୍ସା ପରେ ସେମାନଙ୍କୁ ଛାଡି ଦିଆଯାଇଛି। ଖବର ପାଇ ସ୍ଥାନୀୟ ପୁଲିସ ଦୁର୍ଘଟଣା ସ୍ଥଳକୁ ଯାଇ ତଦନ୍ତ କରି ଫେରିଛି।
