ସମ୍ବଲପୁର : ସମ୍ବଲପୁର ଅବକାରୀ ବିଭାଗ ପକ୍ଷରୁ ଗଞ୍ଜେଇ ଚାଲାଣକୁ ନେଇ ନିୟମିତ ପେଟ୍ରୋଲିଂ ସମୟରେ ବିପୁଳ ମାତ୍ରାରେ ଗଞ୍ଜେଇ, ଗାଡି ଓ ଚାଲାଣକାରୀ ଧରା ପଡୁଛନ୍ତି। ଏହି କ୍ରମରେ ସମ୍ବଲପୁର ଅବକାରୀ ବିଭାଗର ଇଆଇବି ୟୁନିଟ ପକ୍ଷରୁ ରବିବାର ସକାଳ ସମୟରେ ପେଟ୍ରୋଲିଂ ସମୟରେ ୧ କ୍ୱିଣ୍ଟାଲ ଗଞ୍ଜେଇ ଧରାପଡିଛି। ଅବକାରୀ ଅଧିକାରୀ ବିପ୍ର ଚରଣ ମଣ୍ଡଳ ଙ୍କ ନେତୃତ୍ୱରେ ଅବକାରୀ ଦଳ ବିଜୁ ଏକ୍ସପ୍ରେସ ୱେର ପ୍ରଧାନପାଲି ଛକ ନିକଟରେ ଥିବା ଚେକ ଗେଟ ଅଞ୍ଚଳରେ ଚେକିଂ ସମୟରେ ଏକ ହୁଣ୍ଡାଇ କାରକୁ ଧରିଥିଲେ। ଉକ୍ତ ଗାଡିକୁ ଚେକିଂ କରିବାରୁ ସେଠାରେ ଲୁକ୍କାୟିତ ଭାବରେ ରଖାଯାଇଥିବା ୧ କ୍ୱିଣ୍ଟାଲ ଗଞ୍ଜେଇ ଜବତ ହୋଇଥିଲା।
ଗାଡିରେ ଛତିଶଗଡ ରାଜ୍ୟର ଜସପୁର ଜିଲା ତୁମଲା ଥାନା ଅର୍ନ୍ତଗତ ଦଙ୍ଗବଣ୍ଡିହି ଗ୍ରାମର ଚନ୍ଦ୍ର ସାଇ ପାନିକ୍ରା ଓ ନିପୁନ ଚୌହାନ ବୌଦ୍ଧ ଜିଲାରୁ ଛତିଶଗଡ ରାଜ୍ୟକୁ ଗଞ୍ଜେଇ ଚାଲଣ କରୁଥିଲେ। ଏଣୁ ଅଭିଯୁକ୍ତ ମାନଙ୍କୁ ଅବକାରୀ ବିଭାଗ ଏକ ମାମଲା ରୁଜୁ କରି ଗିରଫ କରିଛି। ଜବତ ହୋଇଥିବା ଗଞ୍ଜେଇ ଓ କାରର ଆନୁମାନିକ ମୂଲ୍ୟ ୧୫ ଲକ୍ଷ ଟଙ୍କା ହେବ ବୋଲି ବିଭାଗ ପକ୍ଷରୁ ସୂଚନା ଦିଆଯାଇଛି। ଏହି ଚଢ଼ଉ ସମୟରେ ଦିଲ୍ଲୀପ କୁମାର ରଥ, ଅଲେଖ ପ୍ରଧାନ, ଅଲୋକ ପ୍ରଧାନ, ଅଶୋକ ଖଡିଆ, ତାପସ ସାହୁ, ରଶ୍ମୀ ଦାସ, ଆଶିଷ ସାହୁ ପ୍ରମୁଖ ସାମିଲ ରହିଥିଲେ। ଗିରଫ ହୋଇଥିବା ଅଭିଯୁକ୍ତମାନଙ୍କୁ ଅଦାଲତକୁ ଚାଲାଣ କରାଯାଇଛି।
Comments are closed.