ରେଙ୍ଗାଲିକ୍ୟାମ୍ପ: ଅତାବିରା ଆରଏମସିକୁ ଆସିଥାନ୍ତେ ଯୋଗାଣ ବିଭାଗୀୟ ସଚିବ ବୀର ବିକ୍ରମ ସିଂହ ଯାଦବ। ସଚିବଙ୍କୁ ଦେଖା କରି ଚାଷୀଙ୍କ ଦୁଃଖ କହିବା ପାଇଁ ଓଡ଼ିଶା ରାଜ୍ୟ କୃଷକ ସଂଗଠନର ଦୀର୍ଘ ୭ ଘଣ୍ଟା ଅପେକ୍ଷାର ଫଳ ଶୂନ ହୋଇଗଲା । ବାଟ ଭାଙ୍ଗି ଚାଲିଗଲେ ସଚିବ ।
ଘଟଣା ସୂତ୍ରରୁ ଜଣାପଡ଼ିଛି ଯେ, ଓଡ଼ିଶା ରାଜ୍ୟ କୃଷକ ସଂଗଠନ ଅତାବିରା ଶାଖା ଅତାବିରା ଏନଏସିକୁ ଯୋଗାଣ ସଚିବଙ୍କ ଆଗମନର ବାର୍ତ୍ତା କୌଣସି ବିଶ୍ବସ୍ତ ସୂତ୍ରରୁ ଜାଣି ପାରିଥିଲା। ତେଣୁ ତାଙ୍କୁ ଭେଟି ଚାଷୀଙ୍କ ସମସ୍ତ ସମସ୍ୟାକୁ ଜଣାଇବେ ଓ ତାଙ୍କର ଦୁଃଖ ଶୁଣିବେ ବୋଲି ବଡ ଆଶା ରଖିଥିଲେ । ତେଣୁ ସଂଗଠନର ସଭାପତି ହାରାଧାନ ପ୍ରଧାନଙ୍କ ଅଧ୍ୟକ୍ଷତାରେ ସଂଘର ସମସ୍ତ ସଭ୍ୟମାନେ ଧାଇଁ ଆସିଥିଲେ ଆରଏମସିକୁ। ସକାଳ ୧୦ଟାରୁ ଅପରାହ୍ନ ୨ଟା ପର୍ଯ୍ୟନ୍ତ ଭୋକ ଓ ଦୁଃଖକୁ ଭୁଲିଯାଇ ପରିଣତ ବୟସରେ ସେମାନେ ଜଗିଥିଲେ ଚାଷୀଙ୍କ ପାଇଁ । କିନ୍ତୁ ପରେ ଜାଣିପାରିଲେ ଯେ ସଚିବ ସେହି ରାସ୍ତା ଦେଇ ଚାଲିଗଲେ ଅନ୍ୟତ୍ର, ଅଥଚ ଅଟକିଲେ ନାହିଁ ଅତାବିରାରେ । ତେଣୁ ସେମାନେ ବାଧ୍ୟ ହୋଇ ଅପରାହ୍ନ ୨ଟାରେ ଚାଷୀଙ୍କ ସମସ୍ୟାଗୁଡ଼ିକୁ ଲିଖିତ ଭାବରେ ଅତିରିକ୍ତ ତହସିଲଦାର ରଞ୍ଜନ ଦାଶଙ୍କ ମାଧ୍ୟମରେ ଜଣାଇଛନ୍ତି ସଚିବଙ୍କ ପାଖକୁ । ଦଖଲ ଅନୁଯାୟୀ ରୟତି ଚାଷ ଜମିର ପଞ୍ଜିକରଣ, ମଣ୍ଡି ବ୍ୟବସ୍ଥାର ସୁଦୃଢ଼ୀକରଣ ଆଦି ଉପରେ ଦାବି ପତ୍ର ପ୍ରଦାନ କରିଥିଲେ । ଦାବିପତ୍ର ପ୍ରଦାନ ପରେ ସେମାନେ ପୁଣି ଅପେକ୍ଷା କରି ରହିଥିଲେ ସଚିବଙ୍କ ଆସିବା ପଥକୁ, କାଳେ ସେ ଆସିବେ ବୋଲି । କାରଣ ଅତାବିରା ହେଉଛି ଓଡ଼ିଶାର ଭାତହାଣ୍ଡି । ଏହି ଅଞ୍ଚଳରେ ଅଧିକାଂଶ ଚାଷୀ ରହିଛନ୍ତି ଓ ତତ୍ ସହିତ ଚାଷୀଙ୍କ ସମସ୍ୟା ମଧ୍ୟ। ଆଶା ଥିଲା ସଚିବଙ୍କ ଅଧିକ ଦୃଷ୍ଟି ଏହି ମାର୍କେଟ ଅନ୍ତର୍ଭୁକ୍ତ ଚାଷୀଙ୍କ ଉପରେ ରହିଥିବ । କିନ୍ତୁ ସବୁ ଓଲଟା । ପ୍ରକୃତରେ ସଚିବ ଜାଣିଶୁଣି ଏଠାରେ ଅଟକି ନଥିଲେ । କାରଣ ଚାଷୀମାନଙ୍କ ସମସ୍ୟା ବିଷୟରେ ଜାଣିବାକୁ ଚାହୁଁ ନାହାନ୍ତି ସେ ବୋଧହୁଏ । ସନ୍ଧ୍ୟା ୫ଟା ପରେ ନିରାଶ ହୋଇ ସଂଗଠନ ଫେରିଥିଲା। ଏହି ଘଟଣାକୁ ଅନୁଧ୍ୟାନ କଲେ ଏଥିରୁ ସ୍ପଷ୍ଟ ପ୍ରତ୍ୟୟ ହେଉଛି, ସବୁ ସମସ୍ତେ ଜାଣି ଶୁଣି ଅଭିନୟ କରୁଛନ୍ତି ସଚ୍ଚୋଟତାର । ପ୍ରକୃତରେ ଜଣେ ଅନ୍ୟ ଉପରେ ଦୋଷ ଲଦି ଦେଇ ନିଜେ ନିଶ୍ଚିନ୍ତ ହେବାକୁ ଶ୍ରେୟ ମଣୁଛନ୍ତି । କିନ୍ତୁ ଏଥିରେ ମଝିରେ ପିଶି ହେଉଛି ଚାଷୀ । ତେଣୁ ସଚିବଙ୍କ ଏପରି ଏକ ଚାଷୀ ବହୁଳ ଅଞ୍ଚଳକୁ ଅଣଦେଖା କରିବା ପଛରେ ରହସ୍ୟ କଣ । ଚାଷୀଙ୍କୁ କେବେ ତାଙ୍କର ହକ ମିଳିବା, ଚକବନ୍ଦି ସମସ୍ୟାର ସମାଧାନ ଆଉ କେବେ ହେବ, ଏମିତି ଅନେକ ସମସ୍ୟାର ସମାଧାନ ପାଇଁ କେବେ ପଦକ୍ଷେପ ନିଆଯିବ ସେ ଅପେକ୍ଷାରେ ସଂଗଠନ । ଏହି ଧାରଣାରେ ସଂଗଠନର ସମ୍ପାଦକ ଲୋକେଶ୍ଵର ପ୍ରଧାନ, ବସନ୍ତ ବାରିକ, ଭିକାରୀ ବାରିକ, ବୃଷଭାନୁ ସାହୁ, ପଲଉ ମାଝୀ, ଜଗନ୍ନାଥ ସାହୁ, ମହାଦେବ ମହାପାତ୍ର, ହୃଷୀକେଶ ପ୍ରଧାନ ପ୍ରମୁଖ ଉପସ୍ଥିତ ଥିଲେ ।
