ମୁମ୍ବାଇ: ବଲିଉଡ଼ ଅଭିନେତ୍ରୀ ଆଲିଆ ଭଟ୍ଟ ଏବେ ତାଙ୍କ ଫିଲ୍ମ ‘ବ୍ରହ୍ମାସ୍ତ୍ର ପାର୍ଟ ୱନ୍ ଶିବା’କୁ ନେଇ ଚର୍ଚ୍ଚାରେ। ଅୟାନ ମୁଖାର୍ଜୀ ନିର୍ଦେଶିତ ଏହି ଚଳଚ୍ଚିତ୍ର ବକ୍ସ ଅଫିସରେ ହଇଚଇ ସୃଷ୍ଟି କରିଛି। ତେବେ ବର୍ତ୍ତମାନ ଖବର ସାମ୍ନାକୁ ଆସିଛି ଯେ, ‘ଆରଆରଆର’ ପରେ ଆଲିଆ ଭଟ୍ଟ ପୁଣି ଥରେ ଏସଏସ୍ ରାଜାମୌଲୀଙ୍କ ସହ ବଡ଼ ପରଦାରେ ଧମାଲ୍ କରିବାକୁ ପ୍ରସ୍ତୁତ।
ସୂଚନା ମୁତାବକ, ଆଲିଆ ଏସଏସ ରାଜାମୌଲୀଙ୍କ ଏକ ମେଗା ବଜେଟ୍ ଫିଲ୍ମ ପାଇଁ ଚୁକ୍ତି ସ୍ବାକ୍ଷର କରିଛନ୍ତି, ଯେଉଁଥିରେ ସେ ମହେଶ ବାବୁଙ୍କ ସହ ନଜର ଆସିବେ। ୮୦୦ କୋଟି ଟଙ୍କାର ବଜେଟରେ ଏହି ଚଳଚ୍ଚିତ୍ରର ନିର୍ମାଣ ହେବ ବୋଲି ସୂଚନା ମିଳିଛି। କୁହାଯାଉଛି ଯେ, ଆଲିଆ ମାଆ ହେବା ପରେ ଫିଲ୍ମର ଶୁଟିଂ ଆରମ୍ଭ ହେବ। ଏଠାରେ ସୂଚନାଯୋଗ୍ୟ ଯେ, ଆଲିଆ ଭଟ୍ଟ ଖୁବଶୀଘ୍ର ତାଙ୍କ ପ୍ରଥମ ସନ୍ତାନକୁ ଦୁନିଆକୁ ସ୍ୱାଗତ କରିବାକୁ ଯାଉଛନ୍ତି।
କିଛିଦିନ ପୂର୍ବରୁ ଖବର ଆସିଥିଲା ଯେ, ଏସଏସ୍ ରାଜାମୌଲୀ ମହେଶ ବାବୁଙ୍କ ସହ ପାନ୍ ଇଣ୍ଡିଆ ଫିଲ୍ମ କରିବାକୁ ଯାଉଛନ୍ତି। ଆମେରିକାର ଏକ ଚଳଚ୍ଚିତ୍ର ମହୋତ୍ସବରେ ରାଜାମୌଲୀ କହିଥିଲେ ଯେ, ତାଙ୍କର ପରବର୍ତ୍ତୀ ଚଳଚ୍ଚିତ୍ର ବିଗ୍ ବଜେଟ୍ର ଆକ୍ସନ୍ ଆଡ଼ଭେନ୍ଚର୍ ଭିତ୍ତିକ ହେବ। ରାଜାମୌଲୀ ‘ଆରଆରଆର’ ଏବଂ ‘ବାହୁବଲୀ’ ଚଳଚ୍ଚିତ୍ର ପରି ପୁଣି ଧମାକା କରିବାକୁ ପ୍ରସ୍ତୁତ। ଏହି ଦୁଇଟି ଯାକ ଚଳଚ୍ଚିତ୍ର ବକ୍ସ ଅଫିସରେ ହଇଚଇ ସୃଷ୍ଟି କରିଥିଲା। ‘ଆରଆରଆର’ରେ ମଧ୍ୟ ଆଲିଆଙ୍କୁ ଦେଖିବାକୁ ମିଳିଥିଲା।
