ବଲାଙ୍ଗିର, :ଶନିବାର ଭୋର ୪ଟା ବେଳେ ବଲାଙ୍ଗିର-ସମ୍ବଲପୁର ଜାତୀୟ ରାଜପଥ-୨୬ର ଛତାମଖନା ଛକରେ ଏକ ମର୍ମନ୍ତୁଦ ସଡକ ଦୁର୍ଘଟଣା ହୋଇଛି । ଏକ ଅଜଣା ଭାରିଯାନ ଧକ୍କାରେ ଟ୍ରକ ଚାଳକଙ୍କ ମୃତ୍ୟୁ ହୋଇଛି ।
ସୂଚନା ଅନୁସାରେ, ଓଡି୨୩ଏମ୍ ୯୯୪୧ ନମ୍ବର ଟ୍ରକ ବଲାଙ୍ଗିର ପଟୁ ବରଗଡ ଆଡକୁ ଯାଉଥିଲା । ଏକ ଅଜଣା ଭାରିଯାନ ସାମ୍ନା ପଟୁ ଆସି ଟ୍ରକଟିକୁ ଧକ୍କା ଦେଇ ଚାଲି ଯାଇଥିଲା । ଚାଳକ ଟ୍ରକର କ୍ୟାବିନ୍ ଭିତରେ ଚାପି ହୋଇଯାଇଥିଲେ । ଦୁର୍ଘଟଣା ଖବର ପାଇ ଲୋଇସିଂହା ଓ ବଲାଙ୍ଗିର ଅଗ୍ନିଶମ ବିଭାଗର କର୍ମଚାରୀମାନେ ଘଟଣାସ୍ଥଳରେ ପହଞ୍ଚିଥିଲେ । କ୍ୟାବିନରେ ଚାପି ହୋଇ ରହିଥିବା ଟ୍ରକ ଚାଳକଙ୍କୁ ଉଦ୍ଧାର କରି ବଲାଙ୍ଗିର ଭୀମ ଭୋଇ ଡାକ୍ତରଖାନାରେ ଭର୍ତ୍ତି କରିଥିଲେ । ଡାକ୍ତର ଟ୍ରକ ଚାଳକଙ୍କୁ ମୃତ ଘୋଷଣା କରିଥିଲେ । ତାଙ୍କ ପରିଚୟ ମିଳି ପାରି ନଥିଲା ।
ଶବକୁ ବ୍ୟବଚ୍ଛେଦ ଗୃହରେ ରଖାଯାଇଥିଲା । ପୁଇଁନ୍ତଲା ପୁଲିସ ପହଞ୍ଚି ତଦନ୍ତ ଆରମ୍ଭ କରିବା ସହ ଗାଡି ମାଲିକଙ୍କୁ ଯୋଗାଯୋଗ କରି ଚାଳକଙ୍କ ପରିଚୟ ପାଇଥିଲା । ଏନେଇ ଥାନାରେ ଏକ ଦୁର୍ଘଟଣା ମାମଲା ରୁଜୁ ହୋଇଛି । ଦୁର୍ଘଟଣା ଘଟଣାଇଥିବା ଗାଡିର ଖୋଜଖବର ମିଳିପାରିନି । ତେବେ ଚାଳକ ଜଣଙ୍କ ବିହାର ରାଜ୍ୟର ଅଖିଳେଶ କୁମାର । ସେ ଝାରସୁଗୁଡା ଜିଲା ବ୍ରଜରାଜନଗରରେ ରହି ଟ୍ରକ ଚଳାଉଥିଲେ । ପରିବାର ଲୋକେ ସୂଚନା ପାଇ ବଲାଙ୍ଗିର ଭୀମ ଭୋଇ ଡାକ୍ତରଖାନାକୁ ଆସିଥିଲେ । ଶବ ବ୍ୟବଚ୍ଛେଦ ପରେ ମୃତ ଅଖିଳେଶଙ୍କ ମରଶରୀର ପରିବାର ଲୋକଙ୍କୁ ପୁଇଁନ୍ତଲା ପୁଲିସ ହସ୍ତାନ୍ତର କରିଛି ।
