ବୌଦ୍ଧ: ବୌଦ୍ଧ ଜିଲା ଖୋର୍ଦ୍ଧା–ବଲାଙ୍ଗୀର ଜାତୀୟ ରାଜପଥ (୫୭)ର ବୌଦ୍ଧ ଥାନା ଅନ୍ତର୍ଗତ ରାଧାନଗରଠାରେ ଏକ ଯାତ୍ରୀବାହୀ ବସ ସହ ଏକ ଟ୍ରକର ମୁହାଁମୁହିଁ ଧକ୍କା ଯୋଗୁଁ ୩ ଜଣ ଆହତ ହୋଇଥିବା ଜଣାପଡିଛି । ମିଳିଥିବା ସୂଚନା ଅନୁଯାୟୀ ଗତକାଲି ରାତିରେ ଦିଲଖୁସ ନାମକ ଏକ ଯାତ୍ରୀବାହୀ ବସ ( ଓଡି–୦୨ଏୟୁ–୨୫୯୭) ଜୟପୁରରୁ ଭୁବନେଶ୍ୱର ଯାଉଥିବାବେଳେ ବିପରୀତ ଦିଗରୁ ଆସୁଥିବା ଏକ ମାଲବାହୀ ଟ୍ରକ ରାଧାନଗର ଛକଠାରେ ବର୍ଷା ପବନ ଯୋଗୁଁ ରାସ୍ତା ଉପରେ ପଡିଥିବା ଗଛକୁ ଅତିକ୍ରମ କଲାବେଳେ ବସଟି ଭାରସାମ୍ୟ ହରାଇ ଟ୍ରକ ସହ ମୁହାଁମୁହିଁ ଧକ୍କା ହୋଇଥିଲା । ଏହି ଘଟଣା ରାତି ୩ଟା ସମୟରେ ହୋଇଥିବା ଜଣାପଡିଛି ।
ଦୁର୍ଘଟଣା ଯୋଗୁଁ ବସର ଚାଳକ ନୟାଗଡ ଜିଲା ଶରଣଖୋଲ ଜଡିଆପାଲିର ରୁଷିନାଥ ପାଇକରାୟ (୪୬) ଓ କଟକ ଜିଲା ବାଙ୍କିର ବସ କଣ୍ଡକଟର କିଶାନ ମହାପାତ୍ର (୪୬ ) ଓ ଟ୍ରକ ଚାଳକ ନୟାଗଡ ଜିଲା ପୁରୁଣାଦଶପଲାର ବିକ୍ରମ ରଣା ( ୩୫) ଆହତ ହୋଇଥିଲେ । ଆହତ ମାନଙ୍କୁ ସ୍ଥାନୀୟ ମଟର ଚାଳକ ସଂଘର କର୍ମକର୍ତ୍ତା, ପୁଲିସ ଓ ଦମକଳ ବାହିନୀର କର୍ମଚାରୀ ମାନେ ଉଦ୍ଧାର କରି ଆମ୍ବୁଲାନ୍ସ ଯୋଗେ ବୌଦ୍ଧ ମୁଖ୍ୟ ଡାକ୍ତରଖାନାକୁ ପଠାଇଥିଲେ । ବସରେ ଥିବା ୨୦ରୁ ଅଧିକ ଯାତ୍ରୀ ଏହି ଦୁର୍ଘଟଣାରୁ ଅଳ୍ପକେ ରକ୍ଷା ପାଇଛନ୍ତି । ଦୁର୍ଘଟଣା ଯୋଗୁଁ ପ୍ରାୟ ୩ ଘଣ୍ଟା ଧରି ଜାତୀୟ ରାଜପଥରେ ଯାତାୟାତ ଠପ ହୋଇଯାଇଥିଲା । ଘଟଣାସ୍ଥଳରେ ବୌଦ୍ଧ ପୁଲିସ ପହଞ୍ଚି ଦୁଇଗାଡିକୁ ରାତିରେ ହଁ ରାଜପଥରୁ ହଟାଇବା ପରେ ଯାନବାହାନ ଚଳାଚଳ ସ୍ୱାଭାବିକ କରିଥିଲା । ଏନେଇ ବୌଦ୍ଧ ଥାନାରେ ଏକ ମାମଲା ୨୧୬/୨୨ ରେ ରୁଜୁ ହୋଇଥିବା ଜଣାଯାଇଛି ।
