ଶ୍ରୀନଗର : ଗୁରୁବାର ପୁଣି ଆତଙ୍କବାଦୀଙ୍କ ନୃଂଶସକାଣ୍ଡ ଦେଖାଯାଇଛି । ଆଉ ଜଣେ ହିନ୍ଦୁଙ୍କୁ ଗୁଳିକରି ଆତଙ୍କବାଦୀ ହତ୍ୟା କରିଛନ୍ତି । ମୃତକ ଜଣକ ଜଣେ ବ୍ୟାଙ୍କ ପ୍ରବନ୍ଧକ ହୋଇଥିବା ବେଳେ ସେ ରାଜସ୍ଥାନର ବାସିନ୍ଦା ବୋଲି ଜଣାପଡିଛି । ଲଗାତାର ହିନ୍ଦୁଙ୍କୁ ଟାର୍ଗେଟ କରି ହତ୍ୟା କରାଯାଉଛି । କୁଲଗାମ ଜିଲାରେ ପୁଣି ଆତଙ୍କବାଦୀ ଭିନ୍ନ ରାଜ୍ୟରୁ ସମ୍ବନ୍ଧ ରଖୁଥିବା ଜଣେ ବ୍ୟାଙ୍କକର୍ମୀଙ୍କ ଉପରେ ଆକ୍ରମଣ କରିଥିଲେ । ଗୁଳି ବାଜିବା ପରେ ତାଙ୍କୁ ତୁରନ୍ତ ହସ୍ପିଟାଲ ନିଆଯାଇଥିଲା । ମାତ୍ର ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି । ସେ ରାଜସ୍ଥାନର ବିଜୟ କୁମାର ବୋଲି ଜଣାପଡିଛି । ଏହାପୂର୍ବରୁ ମଙ୍ଗଳବାର ଦିନ ମଧ୍ୟ ଜଣେ ହିନ୍ଦୁ ଶିକ୍ଷୟତ୍ରୀଙ୍କୁ ଗୁଳି କରି ଆତଙ୍କବାଦୀମାନେ ହତ୍ୟା କରିଥିଲେ ।
ସୂଚନାଯୋଗ୍ୟ, କୁଲଗାମର ମୋହନପୋରାରେ ଦେହାତୀ ବ୍ୟାଙ୍କରେ ବିଜୟ ଜଣେ ବ୍ୟାଙ୍କ ପ୍ରବନ୍ଧକ ଭାବେ କାର୍ଯ୍ୟରତ ଥିଲେ । ଜଣେ ଅଧିକାରୀଙ୍କ କହିବାନୁଯାୟୀ, ସେ କୁଲଗାମରେ ମୋହନପୋରା ଶାଖାରେ କାର୍ଯ୍ୟରତ ଥିବା ସମୟରେ ଆତଙ୍କବାଦୀ ତାଙ୍କୁ ଗୁଳିକରି ହତ୍ୟା କରିଛନ୍ତି । ଆକ୍ରମଣକାରୀଙ୍କୁ ଧରିବା ପାଇଁ ସୁରକ୍ଷାକର୍ମୀ ଅଞ୍ଚଳକୁ ନାକାବନ୍ଦୀ କରି ତଲାସି ଅଭିଯାନ ଜାରି ରଖିଛନ୍ତି ।
