ନୂଆଦିଲ୍ଲୀ: ଦେଶରେ ପୁଣି ଉପର ମୁହାଁ କରୋନା ସଂକ୍ରମଣ । ଗତ କିଛି ଦିନ ଧରି କରୋନା ସଂକ୍ରମଣ ୩ହଜାର ଭିତରେ ସୀମିତ ରହୁଥିବା ବେଳେ ଆଜିର ସଂକ୍ରମଣ ମାମଲା ୪ ହଜାର ମୁହାଁ ହୋଇଛି । ଗତ ୨୪ ଘଣ୍ଟାରେ ଦେଶରେ ଆଉ ୩ହଜାର ୭୧୨ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ସେହିପରି କରୋନାରୁ ଗୋଟିଏ ଦିନରେ ୨ହଜାର ୫୮୪ଜଣ ସଂକ୍ରମିତ ସୁସ୍ଥ ହୋଇଛନ୍ତି । ଏବେ ବି କରୋନା ଯୋଗୁ ଲୋକଙ୍କ ମୃତ୍ୟୁ ହେଉଛି । ଦେଶରେ କରୋନା ଯୋଗୁ ଆଉ ୫ ଜଣ ସଂକ୍ରମିତଙ୍କ ମୃତ୍ୟୁ ହୋଇଥିବା ସୂଚନା ଦିଆଯାଇଛି ।
ଆଜିର ମୃତକଙ୍କୁ ମିଶାଇ ଦେଶରେ ମୋଟ୍ କରୋନା ଜିନତ ମୃତ୍ୟୁସଂଖ୍ୟା ୫,୨୪,୬୪୧ ରହିଛି । ଅନ୍ୟପଟେ ଦେଶରେ ଦୈନିକ ସଂକ୍ରମଣ ବଢ଼ିବାରୁ ପଜିଟିଭିଟି ହାର ମଧ୍ୟ ବୃଦ୍ଧି ପାଇଛି । ଦେଶରେ ୦.୮୪ ପ୍ରତିଶତ ରହିଛି ଦୈନିକ ପଜିଟିଭିଟି ହାର । ଆଜିର ଚିହ୍ନଟ ଆକ୍ରାନ୍ତଙ୍କୁ ମିଶାଇ ଦେଶରେ ମୋଟ୍ ୧୯,୫୦୯ ସକ୍ରିୟ ଆକ୍ରାନ୍ତ ରହିଛନ୍ତି । ଦେଶରେ ଏଯାଏ କରୋନାରୁ ଦେଶରେ ମୋଟ୍ ସୁସ୍ଥ ହେଲେଣି ୪,୨୬,୨୦,୩୯୪ ସଂକ୍ରମିତ । କରୋନାକୁ ମାତ୍ ଦେବାକୁ ଦେଶରେ ଏବେ ବି ଟିକାକରଣ କରାଯାଉଛି । ଦେଶରେ ମୋଟ୍ ୧୯୩.୭୦କୋଟି ଡୋଜ୍ ଟିକା ଦିଆସରିଲାଣି ।
