କର୍ମକ୍ଷେତ୍ରରେ କର୍ମଚାରୀଙ୍କ ମଦ୍ୟପାନ; ୪୨ଟି ବିମାନବନ୍ଦରରେ ମଦ୍ୟପାନ କରି କାମ କରୁଛନ୍ତି ୮୪ କର୍ମଚାରୀ, ୬୪% ଡ୍ରାଇଭର ମଦ୍ୟପ

ନୂଆଦିଲ୍ଲୀ: କର୍ମକ୍ଷେତ୍ରରେ ବଢ଼ୁଛି କର୍ମଚାରୀଙ୍କ ମଦ୍ୟପାନ । ଦେଶର ୪୨ଟି ବିମାନବନ୍ଦରରେ କାର୍ଯ୍ୟରେ ନିୟୋଜିତ ଥିବା କର୍ମଚାରୀ ମଦ୍ୟପାନ କରୁଥିବାର ଏକ ରିପୋର୍ଟ ସାମ୍ନାକୁ ଆସିଛି । ଡିଜିସିଏର ରିପୋର୍ଟ ଅନୁଯାୟୀ ଦେଶର ୪୨ଟି ବିମାନବନ୍ଦରର ୮୪ଜଣ କର୍ମଚାରୀ ମଦ୍ୟପାନ କରି କାମ କରୁଥିବା କୁହାଯାଉଛି । ତାହାଛଡ଼ା ବିମାନବନ୍ଦରରେ ନିୟୋଜିତ ହୋଇଥିବା ଡ୍ରାଇଭର ମାନଙ୍କ ମଧ୍ୟରୁ ୬୪% ଡ୍ରାଇଭର ମଦ୍ୟପାନ କରୁଥିବା ଜଣାପଡ଼ିଛି ।

ଡିଜିସିଏର ଏହି ରିପୋର୍ଟ ୨୦୨୧ ମାର୍ଚ୍ଚରୁ ୨୦୨୨ ଯାଏ ରହିଛି । ସବୁଠାରୁ ବଡ଼ କଥା ହେଉଛି ଏହି ୮୪ ଜଣ ମଦ୍ୟପ କର୍ମଚାରୀଙ୍କ ମଧ୍ୟରେ ଅଧିକାଂଶ ବିମାନବନ୍ଦରର ଅପରେଟର କର୍ମଚାରୀ ବୋଲି କୁହାଯାଇଛି । ସବୁଠାରୁ ବଡ଼ କଥା ହେଉଛି ବିମାନବନ୍ଦର ପରି କାର୍ଯ୍ୟସ୍ଥଳୀରେ କର୍ମଚାରୀଙ୍କ ମଦ୍ୟପାନ ସମସ୍ତଙ୍କୁ ଚକିତ କରିଛି ।

ରିପୋର୍ଟର ତଥ୍ୟ ଅନୁସାରେ ଏୟାରପୋର୍ଟ ଅଥରିଟି ଅଫ୍‌ ଷ୍ଟାଫ୍‌ (ଏଏଆଇ) ଦ୍ୱାରା ଚାଳିତ ୩୫ଟି ଏୟାରପୋର୍ଟରେ ୫୬ଜଣ କର୍ମଚାରୀ ମଦ୍ୟପାନ କରି କାମ କରୁଛନ୍ତି । ସେହିପରି ଆଦାନୀ ଗ୍ରୁପ୍‌ ଦ୍ୱାରା ଚାଳିତ ୪ଟି ବିମାନବନ୍ଦରରେ ୧୭ଜଣ । ଜିଏମଆର ଦ୍ବାରା ପରିଚାଳିତ ୨ଟି ବିମାନବନ୍ଦରରେ ୯ଜଣ ଓ ଫେୟାରଫ୍ୟାକ୍ସ ଇଣ୍ଡିଆ ଦ୍ୱାରା ପରିଚାଳିତ ବାଙ୍ଗାଲୋର ବିମାନବନ୍ଦରରେ ମଧ୍ୟ ୨ଜଣ ମଦ୍ୟପାନଦ କରି କାର୍ଯ୍ୟକରୁଥିବା କୁହାଯାଇଛି ।