କିଭ୍: ୧୮ଦିନରେ ପହଞ୍ଚିଲାଣି ୟୁକ୍ରେନ୍-ରୁଷ ଲଢ଼େଉ । ଯୁଦ୍ଧ ଥମିବା ପରିବର୍ତ୍ତେ ଆହୁରି ଉଗ୍ରରୂପ ଧାରଣ କରୁଥିବା ଦେଖିବାକୁ ମିଳିଛି । ୟୁକ୍ରେନ୍ ମାଟିରେ ଏବେ ବି ଶୁଭୁଛି ବିସ୍ଫୋରଣର ଶବ୍ଦ । ରୁଷ ଆକ୍ରମଣରେ ୟୁକ୍ରେନର ଅନେକ ସହର ଖିନଭିନ୍ ହୋଇସାରିଲାଣି । ଅଜି ପୁଣି ୟୁକ୍ରେନର ରାଜଧାନୀ କିଭ୍ ଉପରେ ଘନଘନ ଆକ୍ରମଣ କରିଛି ରୁଷ । ରୁଷ ସୈନ୍ୟଙ୍କ ଗୁଳିମାଡ଼ରେ ୟୁକ୍ରେନର ଜଣେ ଶିଶୁ ସମେତ ୭ ଜଣଙ୍କ ମୃତ୍ୟୁ ହୋଇଥିବା ଜଣାପଡ଼ିଛି ।
ରୁଷ ଏହି ଆକ୍ରମଣ ୟୁକ୍ରେନର ଗ୍ରୀନ କରିଡରରେ କରିଥିବା କହିଛି ୟୁକ୍ରେନ୍ । ସେପଟେ ଯୁଦ୍ଧ ବନ୍ଦ କରିବାକୁ ହୋଇ ସାରିଲାଣି ଚାରି ଚାରି ଥର ଆଲୋଚନା । ୪ଥର ଆଲୋଚନା ପରେ ବି ବାହାରୁନି ସମାଧନର ବାଟ । ବେଲାରୁଷରେ ଉଭୟଙ୍କ ମଧ୍ୟରେ ହୋଇଥିବା ଅଲୋଚନାରେ କୌଣସି ସୁଫଳ ମିଳିପାରିନାହିଁ । ତେବେ ଯୁଦ୍ଧକୁ ନେଇ ପୁଣି ହୋଇପାରେ ଉଭୟଙ୍କ ମଧ୍ୟରେ ଆଲୋଚନା ।
ଏନେଇ ପୁଟିନଙ୍କ ସହ ଆଲୋଚନା ପାଇଁ ପ୍ରସ୍ତାବ ଦେଇଛନ୍ତି ଜେଲେନସ୍କି । ଆଲୋଚନାରେ ମଧ୍ୟସ୍ଥି ପାଇଁ ଇସ୍ରାଏଲ ପ୍ରଧାନମନ୍ତ୍ରୀଙ୍କୁ ଜେଲେନସ୍କି ପ୍ରସ୍ତାବ ଦେଇଥିବା ସୂଚନା ମିଳିଛି । ଏହି ଆଲୋଚନା ହେବକି ନାହିଁ ତାହା ଏଯାଏ ସ୍ପଷ୍ଟ ହୋଇନାହିଁ । ୧୮ ଦିନ ଧରି ଲାଗି ରହିଥିବା ଏହି ଯୁଦ୍ଧରେ ଉଭୟ ଦେଶ ରୁଷ ଓ ୟୁକ୍ରେନର ବହୁ କ୍ଷତି ଘଟିଲାଣି । ଉଭୟ ଦେଶର ବହୁ ସୈନକଙ୍କ ମୃତ୍ୟୁ ହୋଇଥିବା ବେଳେ ଅନେକ ସାଧାରଣ ଲୋକଙ୍କ ଜୀବନ ଗଲାଣି ।
