ପିପିଲି : ପୁରୀ ଭୁବନେଶ୍ୱର ୩୧୬ ନମ୍ବର ଜାତୀୟ ରାଜପଥ ପିପିଲି ଟୋଲ ଗେଟ୍ ନିକଟରେ ନାବାଳକଙ୍କ ମୃତଦେହ ରଖି ପରିବାର ଲୋକେ ଆଜି ରାଜପଥ ଅବରୋଧ କରିଛନ୍ତି। ସ୍ଥାନୀୟ ଅଞ୍ଚଳରେ ଉତ୍ତେଜନା ଲାଗି ରହିଛି। ଶହ ଶହ ଯାନବାହନ ଅଟକି ରହିଛି। ନାବାଳକ ଜଣଙ୍କ ଦଶମ ଶ୍ରେଣୀର ଛାତ୍ର। ସେ ନିଜ ମାମୁ ଘର ପୁରୀ ଗୋବିନ୍ଦପୁର ହାଇସ୍କୁଲରେ ପାଠ ପଢୁଥିବା ବେଳେ ଭୁବନେଶ୍ୱରର ବାସିନ୍ଦା ବୋଲି ପ୍ରାଥମିକ ତଦନ୍ତରୁ ଜଣାପଡିଛି। ଖବର ପାଇ ପୁଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ନାବାଳକ ଜଣକ ଗତ ୭ ତାରିଖରୁ ନିଖୋଜ ଥିବା ବେଳେ ୮ ତାରିଖ ଦିନ ତାଙ୍କ ମୃତଦେହ ବଲାଙ୍ଗୀର ଟିଟିଲାଗଡ ଅନ୍ତର୍ଗତ କନ୍ତିଆକଣ୍ଟା ସ୍ଥିତ ରେଳଧାରଣାରେ ପଡିଥିଲା ବୋଲି ଖବର ମିଳିଥିଲା। ପରିବାର ଲୋକେ ତାଙ୍କ ପୁଅକୁ ହତ୍ୟା କରାଯାଇଛି ବୋଲି ଅଭିଯୋଗ କରିଛନ୍ତି। ଏହାସହ ମୃତଦେହ ରଖି ରାସ୍ତା ଅବରୋଧ କରିଛନ୍ତି।
ସେହିପରି ଉକ୍ତ ନାବାଳକ ଜଣକ ପ୍ରେମ ଜନିତ କାରଣରୁ ଆତ୍ମହତ୍ୟା କରିଥିବା ଅନୁମାନ କରାଯାଉଛି। ଅନ୍ୟପଟେ ପୁଲିସ ପ୍ରତିଶ୍ରୁତି ପରେ ରାସ୍ତା ଅବରୋଧ ହଟିଛି ବୋଲି ସୂଚନା ମିଳିଛି।
