ନୂଆଦିଲ୍ଲୀ: ସଂସଦରେ ଉପସ୍ଥାପନ ହେଲା ୨୦୨୨-୨୩ ବଜେଟ୍ । ବଜେଟ୍ ଉପସ୍ଥାପନ କଲେ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ । ଚାଷୀଙ୍କୁ ପ୍ରାଧାନ୍ୟ ଦେଲେ ସରକାର । ରସାୟନ ମୁକ୍ତ ଚାଷକୁ ପ୍ରୋତ୍ସାରହନ ଦେବାକୁ ସରକାର ପ୍ରତିଶ୍ରୁତିବଦ୍ଧ ବୋଲି ନିର୍ମଳା କହିଛନ୍ତି । ଚାଷୀଙ୍କୁ ଡିଜିଟାଲ ସୁବିଧା ଯୋଗାଇ ଦିଆଯିବା ସହ ଚାଷୀଙ୍କ ଠାରୁ ଏମଏସପି ଦରରେ ରେକର୍ଡ ସଂଖ୍ୟକ ଉତ୍ପାଦିତ ଦ୍ରବ୍ୟ କିଣାଯିବ ବୋଲି କହିଲେ ଅର୍ଥମନ୍ତ୍ରୀ । ଏମଏସଏମଇ କ୍ଷେତ୍ର ପାଇଁ ୨ ଲକ୍ଷ କୋଟି ଟଙ୍କାର ଅତିରିକ୍ତ ସହାୟତା ଯୋଗାଇଦିଅଯିବ । ବ୍ୟବସାୟ ଓ ରୋଜଗାର ପାଇଁ ଡିଜିଟାଲ ସ୍କିଲକୁ ବଢାଯିବ । ତାହା ସହ ପିଲାଙ୍କ ପାଇଁ ନିର୍ଦ୍ଦିଷ୍ଟ ଆଇଟିଆଇରେ ଡିଜିଟାଲ ସ୍କିଲର କୋର୍ସ ଆରମ୍ଭ କରାଯିବ । ଗୋଟିଏ ବର୍ଷରେ ୨୦ ହଜାର କୋଟି ବ୍ୟୟବରାଦରେ ୨୫ ହଜାର କିଲୋମିଟର ହାଇୱେ ନିର୍ମାଣ କରାଯିବା ନେଇ ଲକ୍ଷ୍ୟ ରଖାଯାଇଛି । ଆଗାମୀ ୨୫ ବର୍ଷକୁ ଲକ୍ଷ୍ୟ ରଖି ଏହି ବଜେଟ୍ ପ୍ରସ୍ତୁତ କରାଯାଇଥିବା କହିଲେ କେନ୍ଦ୍ର ଅର୍ଥମନ୍ତ୍ରୀ । ମେକ୍ ଇନ୍ ଇଣ୍ଡିଆ ଜରିଆରେ ୬୦ ଲକ୍ଷ ନିଯୁକ୍ତି ସୃଷ୍ଟି କରାଯିବା ନେଇ ଲକ୍ଷ୍ୟ ରଖିଛନ୍ତି ସରକାର ।
ତାହା ସହ ଭିତ୍ତିଭୂମିକୁ ସୁଦୃଢ଼ କରିବାକୁ ପିଏମ ଗତି ଶକ୍ତି ମାଷ୍ଟର ପ୍ଲାନ ପ୍ରସ୍ତୁତ କରାଯାଇଛି । ଆଇଟି ଓ ଘରୋଇ ସେକ୍ଟରକୁ ପୋତ୍ସାହନ ଦିଆଯିବା ସହ ଆଗାମୀ ୩ ବର୍ଷ ମଧ୍ୟରେ ୪୦୦ ନୂଆ ବନ୍ଦେ ଭାରତ ଟ୍ରେନ ଗଡିବ । ୫ଟି ନଦୀକୁ ସଂଯୋଗୀ କରଣ କରାଯିବ ।
