କରୋନା ସଂକ୍ରମଣର ମୁକାବିଲା ଦିଗରେ ରାଜ୍ୟ ସରକାର ଗୋଟିଏ ପରେ ଗୋଟିଏ ପଦକ୍ଷେପ ଗ୍ରହଣ କରୁଥିଲେ ମଧ୍ୟ ତୃଣମୂଳ ସ୍ତରରେ କିଛି ଅସାଧୁ କର୍ମଚାରୀ କଳାବଜାରୀରେ ଲିପ୍ତ ରହିବ ଯୋଗୁ ଜଣ ଅସନ୍ତୋଷ ବୃଦ୍ଧି ପାଇବାରେ ଲାଗିଛି। ସମ୍ବଲପୁର ବୁର୍ଲା ସ୍ତିତ କୋଭିଡ ଡାକ୍ତରଖାନାରେ ଜଣେ କରୋନା ଆକ୍ରାନ୍ତ ବୟସ୍କ ରୋଗୀଙ୍କ ବସ୍ତ୍ର ୭ଦିନ ଧରି ବଦଳା ନ ଯିବା ଓ ସେଥିରେ ମଳତ୍ୟାଗ ଭଳି ଘଟଣା ଏବଂ କେତେକ କୋଭିଡ ଡାକ୍ତରଖାନାରେ ଠିକ ଭାବରେ ଖାଦ୍ୟ ନ ଦେବା ଓ ଯତ୍ନ ନ ନେବା ଭଳି ଘଟଣା ଘଟିଥିବା ବେଳେ ଏବେ ଭଦ୍ରକ ବାସୁଦେବପୁର ଡାକ୍ତରଖାନାରେ କରୋନା ପରୀକ୍ଷାରେ ପାତରଅନ୍ତର ନୀତି ଅବଲମ୍ବନ କରାଯାଉଥିବା ଭଳି ଘଟଣା ସାମ୍ନାକୁ ଆସିଛି।
ରାତି ୪ଟାରୁ କରୋନା ନମୁନା ପରୀକ୍ଷା ପାଇଁ କାହିଁ କେତେ ଦୂରରୁ ଆସିଥିବା ଲୋକମାନେ ଧାଡିରେ ଛିଡା ହୋଇଥିବା ବେଳେ, ସେମାନଙ୍କୁ ତାଲିକାଭୁକ୍ତ ନ କରି ଅନ୍ୟମାନଙ୍କୁ ପରୀକ୍ଷା ପାଇଁ ତାଲିକା କରିବାରୁ ଉତ୍ତେଜନା ଦେଖା ଦେଇଛି। ତେବେ ଆଶ୍ଚର୍ଯ୍ୟର କଥା ହେଉଛି ଯେ ଆଇନଶୃଙ୍ଖଳା ପାଇଁ ନିୟୋଜିତ ପୁଲିସ ଅଧିକାରୀ ଘଟଣାକୁ ଗୁରୁତ୍ୱ ଦେବା ବଦଳରେ ମୋବାଇଲରେ ବ୍ୟସ୍ତ ରହିଥିବା ଭିଡିଓରୁ ସ୍ପଷ୍ଟ ହୋଇଛି। ତେବେ ରାତି ୪ଟାରୁ ଧାଡିରେ ଅପେକ୍ଷାରତ ଲୋକଙ୍କ ବଦଳରେ ଅନ୍ୟମାନଙ୍କ କାହିଁକି ତାଲିକା ହେଉଛି ବୋଲି ପ୍ରଶ୍ନ ହେବାରୁ ଏ ନେଇ ସାର କହିଛନ୍ତି ବୋଲି ଉତ୍ତର ମିଳିଛି କିନ୍ତୁ ସେ ସାର ଜଣଙ୍କ କିଏ ଓ ସେ କାହିଁକି ସରକାରୀ ବ୍ୟବସ୍ତା ବିରୁଦ୍ଧ କାର୍ଯ୍ୟ କରୁଛନ୍ତି, ତାହା ଜଣାପଡିନାହିଁ। ଶେଷରେ ଜଣେ ମେଡିକାଲ କର୍ମଚାରୀ ମୋବାଇଲ ଛଡେଇନେବାକୁ ଉଦ୍ୟମ କରିଥିବା ଜଣାପଡିଛି।
