ୱାଶିଂଟନ: ଆମେରିକାରେ ଏକ ବଡ଼ ଧରଣର ସାଇବର ଆକ୍ରମଣ ହୋଇଛି। ହ୍ୟାକର୍ମାନେ ଦେଶର ସବୁଠୁ ବଡ଼ ଇନ୍ଧନ ପାଇପଲାଇନ୍ ଉପରେ ଏହି ଆକ୍ରମଣ କରିଛନ୍ତି। କରୋନା ଯୋଗୁ ଏହି ଆକ୍ରମଣ ହୋଇଥିବା କୁହାଯାଉଛି। କାରଣ ଏବେ ସବୁ ଇଞ୍ଜିନିୟର ଘରେ ରହି କାମ କରୁଥିବାରୁ ହ୍ୟାକର୍ସଙ୍କୁ ଏହି ସାଇବର ଆକ୍ରମଣ କରିବାରେ ସହଜ ହୋଇଛି। ଅନ୍ୟପଟେ ଏହା ଆମେରିକାରେ ବର୍ତ୍ତମାନ ସୁଦ୍ଧା ସବୁଠୁ ବଡ଼ ସାଇବର ଆକ୍ରମଣ ହୋଇଥିବାବେଳେ ଘଟଣା ପରେ ସରକାରଙ୍କ ପକ୍ଷରୁ ଜରୁରୀ ପରିସ୍ଥିତି ଘୋଷଣା କରାଯାଇଛି। ସାଇବର ଆକ୍ରମଣକାରୀଙ୍କ କବ୍ଜାରେ ପ୍ରାୟ ୧୦୦ ଜିବି ତଥ୍ୟ ରହିଛି।
ସୂଚନା ଅନୁସାରେ, ସାଇବର ଆକ୍ରମଣର ଶିକାର ହୋଇଥିବା କଲୋନିଆନ ପାଇପଲାଇନ ଜରିଆରେ ପ୍ରତିଦିନ ୨୫ ଲକ୍ଷ ବ୍ୟାରେଲ ତୈଳ ଯାଇଥାଏ। ଆମେରିକାର ପୂର୍ବତଟ ରାଜ୍ୟଗୁଡ଼ିକୁ ଏହି ପାଇପଲାଇନ ଜରିଆରେ ୪୫ ପ୍ରତିଶତ ଡିଜେଲ, ଗ୍ୟାସ ଏବଂ ବିମାନ ଇନ୍ଧନ ଯୋଗାଣ ହୋଇଥାଏ। ସାଇବର ଆକ୍ରମଣ ପରେ ଏହି ପାଇପଲାଇନକୁ ମରାମତି କରାଯାଉଛି। ଜରୁରୀ ପରିସ୍ଥିତି ଘୋଷଣା ପରେ ସଡ଼କ ମାର୍ଗରେ ଇନ୍ଧନ ଯୋଗାଣ ହେଉଛି। ଅନ୍ୟପଟେ ହ୍ୟାକରମାନେ କିଛି କମ୍ପ୍ୟୁଟର ଏବଂ ସର୍ଭର ଡାଟାକୁ ଲକ୍ କରିଦେଇଛନ୍ତି। ଏହା ବଦଳରେ ସେମାନେ ସରକାରଙ୍କୁ ବଟି ମାଗୁଥିବା ଜଣାପଡ଼ିଛି।
ଅନ୍ୟପଟେ ଏହି ସାଇବର ଆକ୍ରମଣ ଯୋଗୁ ଇନ୍ଧନ ମୂଲ୍ୟ ୨ରୁ ୩% ବୃଦ୍ଧି ପାଇବା ସମ୍ଭାବନା ରହିଛି। ଯଦି ପାଇପଲାଇନ ମରାମତି ଶୀଘ୍ର ଶେଷ ନ ହୁଏ, ତେବେ ଏହାର ପ୍ରଭାବ ଆହୁରି ବ୍ୟାପକ ହେବାର ଆଶଙ୍କା ରହିଛି।
