କଲକାତା: ପଶ୍ଚିମବଙ୍ଗରେ ନିର୍ବାଚନ ପରବର୍ତ୍ତୀ ହିଂସା ଥମିବାର ନାଁ ଧରୁନାହିଁ। ଫଳାଫଳ ଘୋଷଣା ହେବା ପରଠାରୁ ବିଜେପି କାର୍ଯ୍ୟକର୍ତ୍ତା ଏବଂ ନେତାଙ୍କ ଉପରେ ବାରମ୍ବାର ଆକ୍ରମଣ ହେଉଛି। ଏ ନେଇ ଟିଏମସି ବିରୋଧରେ ବିଜେପି ଅଭିଯୋଗ ଆଣୁଥିବାବେଳେ ଟିଏମସି ତାହାକୁ ଖାରଜ କରିଛି। ବର୍ତ୍ତମାନ ସୁଦ୍ଧା ହିଂସାଯୋଗୁ ୧୪ ଜଣଙ୍କ ମୃତ୍ୟୁ ଘଟିଥିବାବେଳେ ଗୁରୁବାର କେନ୍ଦ୍ର ମନ୍ତ୍ରୀ ଭି. ମୁରଲୀଧରନ ଆକ୍ରମଣର ଶିକାର ହୋଇଛନ୍ତି। ତାଙ୍କ ଗାଡ଼ି ଉପରେ ଏହି ଆକ୍ରମଣ ହୋଇଛି, ତାହା ପୁଲି ପୁଲିସ ଉପସ୍ଥିତିରେ। ପଶ୍ଚିମ ମେଦିନାପୁରର ପଞ୍ଚକୁଡ଼ି ନିକଟରେ ଏହି ଘଟଣା ଘଟିଛି।
ସୂଚନା ଅନୁସାରେ, ଏହି ଘଟଣାର ଏକ ଭିଡିଓ ମଧ୍ୟ ଭାଇରାଲ ହେବାରେ ଲାଗିଛି। ଯେଉଁଥିରେ ଦେଖିବାକୁ ମିଳୁଛି ଯେ କିଛି ଲୋକ କେନ୍ଦ୍ରମନ୍ତ୍ରୀଙ୍କ କାର୍ କାଚ ଭାଙ୍ଗୁଛନ୍ତି। ପୁଲିସ ଗାଡ଼ି ବି ନିକଟରେ ଉପସ୍ଥିତ ଅଛି। କେନ୍ଦ୍ରମନ୍ତ୍ରୀ ବି ଏହାର ଏକ ଭିଡିଓ ଟ୍ବିଟରରେ ପୋଷ୍ଟ କରିଛନ୍ତି। ସେ ଲେଖିଛନ୍ତି, ପଶ୍ଚିମ ମେଦିନାପୁର ଗସ୍ତ ସମୟରେ ତାଙ୍କ ଗାଡ଼ି ଉପରେ ଟିଏମସି ଗୁଣ୍ଡାମାନେ ଆକ୍ରମଣ କରିଛନ୍ତି। ଗାଡ଼ିର କାଚ ଭାଙ୍ଗି ଦିଆଗଲା, ବ୍ୟକ୍ତିଗତ ସୁରକ୍ଷାକର୍ମୀଙ୍କୁ ମାଡ଼ ମରାଗଲା। ଫଳରେ ଅଧାରୁ ଗସ୍ତକୁ ବାତିଲ କରିବାକୁ ପଡ଼ିଲା।
