ସାରା ଦେଶରେ କରୋନା ମାମଲା ବୃଦ୍ଧି ପାଇବାରେ ଲାଗିଛି। ଏଭଳି ପରିସ୍ଥିତିରେ ଦେଶର ବୃହତ୍ତମ ଇସ୍ପାତ କମ୍ପାନୀ ଟାଟା ଷ୍ଟିଲ୍ ନିଜ କର୍ମଚାରୀଙ୍କ ପାଇଁ ‘‘ଯେ କୌଣସି ସ୍ଥାନରୁ କାର୍ଯ୍ୟ’’ (ୱାର୍କ ଫ୍ରମ୍ ଏନିହ୍ବେୟାର) ନୀତି ପ୍ରଚଳନ କରିବାକୁ ଯାଉଛି । ଏହାର ଅର୍ଥ ଟାଟା କମ୍ପାନୀର ଜଣେ କର୍ମଚାରୀ ନିଜ ଘରୁ ବା ଦେଶ ବିଦେଶର କୌଣସି ସ୍ଥାନରୁ କାମ କରିବାକୁ ସକ୍ଷମ ହେବେ । ଚଳିତ ମାସରୁ ଏହି ନୀତି କାର୍ଯ୍ୟକାରୀ ହେବ ବୋଲି ସୂଚନା ମିଳିଛି । ସମ୍ପ୍ରତି ଟାଟା କମ୍ପାନୀ (ଟାଟା ଷ୍ଟିଲ)ରେ ଦେଶରେ ୩୨ହଜାର ସ୍ଥାୟୀ ଓ ୫୫ ହଜାର ଅସ୍ଥାୟୀ କର୍ମଚାରୀ ଅଛନ୍ତି । ସେମାନଙ୍କ ମଧ୍ୟରୁ ୭୦୦୦ କମର୍ଚାରୀ କାର୍ଯ୍ୟାଳୟରେ କାମ କରୁଛନ୍ତି ।
ଇକୋନୋମିକ ଟାଇମ୍ସରେ ପ୍ରକାଶିତ ରିପୋର୍ଟ ଅନୁସାରେ କମ୍ପାନୀ ପ୍ରଥମେ ୧୦% କର୍ମଚାରୀଙ୍କୁ ୱାର୍କ ଫ୍ରମ୍ ଏନିହ୍ବେୟାର (ଡ଼ବ୍ଲ୍ୟୁଏଫ୍ଏ)ରେ କାମ କରିବାକୁ ସୁଯୋଗ ଦେବ, ପରବର୍ତୀ ସମୟରେ ଏହାକୁ ୩୦% ପର୍ଯ୍ୟନ୍ତ ବୃଦ୍ଧି କରାଯିବ । ଅନ୍ୟ କର୍ମଚାରୀମାନେ ୱାର୍କ ଫ୍ରମ୍ ହୋମ (WFH) ବିକଳ୍ପ ପାଇବେ। କୁହାଯାଉଛି ୱାର୍କ ଫ୍ରମ୍ ଏନିହ୍ବେୟାର ଦ୍ବାରା ଅଫିସ ଖର୍ଚରେ ବିପୁଳ ସଞ୍ଚୟ ହେବ ଏବଂ କାର୍ଯ୍ୟ ତୁରନ୍ତ ଓ ଡ଼ିଜିଟାଏ ଜରିଆରେ ସକ୍ଷମ ହୋଇପାରିବ । ଜଣେ କର୍ମଚାରୀ ଆଜିଦିନର କାର୍ଯ୍ୟ ଶେଷ କରି ଆସନ୍ତା ଦିନ ପାଇଁ ମଧ୍ୟ କାମ କରିପାରିବେ ।
ଅନ୍ୟପକ୍ଷରେ ଟାଟା ଅଧୀନସ୍ଥ ଅନ୍ୟ କମ୍ପାନୀ ଟିସିଏସ୍ ୨୦୨୫ ମସିହା ପର୍ଯ୍ୟନ୍ତ କର୍ମଚାରୀଙ୍କୁ ଘରୁ କାର୍ଯ୍ୟ କରିବାକୁ ସୁଯୋଗ ଦେବାକୁ ଚିନ୍ତା କରୁଥିବା କୁହାଯାଉଛି । କମ୍ପାନୀ ପକ୍ଷରୁ ହାଇବ୍ରିଡ଼୍ ୱାର୍କପ୍ଲେସ ଗାଇଡ଼ାନ୍ସ ଜାରି କରାଯାଇଛି । ଏଥିରେ ଟିସିଏସ୍ ୨୫X୨୫ ଭିଜନ ଉପସ୍ଥାପନ କରିଛି । ଏହି ଯୋଜନାରେ ଆଗାମୀ ଦିନରେ କମ୍ପାନୀ ଏକ ନୂଆ କାର୍ଯ୍ୟ ସଂସ୍କୃତି ଆରମ୍ଭ କରିବାକୁ ଯାଉଛି ଏବଂ ଏଥିରେ ୨୫% କର୍ମଚାରୀ ଅଫିସରୁ କାର୍ଯ୍ୟ କରିବେ ଓ ଅନ୍ୟମାନେ ଘରୁ ବା ନିଜ ସୁବିଧା ମୁତାବକ କୌଣସି ସ୍ଥାନରୁ କାମ କରିପାରିବେ । ୨୦୨୫ ସୁଦ୍ଧା ଏହି କାର୍ଯ୍ୟ ସଂସ୍କୃତି କାର୍ଯ୍ୟକାରୀ ହେବ ଏବଂ କୌଣସି କର୍ମଚାରୀଙ୍କୁ ତାଙ୍କ ପୂର୍ଣ ସାମର୍ଥ୍ୟରେ କାର୍ଯ୍ୟ କରିବା ନିମନ୍ତେ ଅଫିସ ପରିସରରେ ୨୫%ରୁ ଅଧିକ ସମୟ ରହିବାକୁ ପଡ଼ିବ ନାହିଁ ।
ଦେଶର ଦ୍ୱିତୀୟ ବୃହତ୍ତମ ସୂଚନା ପ୍ରଯୁକ୍ତିବିଦ୍ୟା (ଆଇଟି) କମ୍ପାନୀ ଇନଫୋସିସ୍ ବର୍ତ୍ତମାନ ୩୩ ପ୍ରତିଶତ କର୍ମଚାରୀଙ୍କୁ ସବୁଦିନ ପାଇଁ ଘରୁ କାମ କରିବାକୁ ସୁଯୋଗ ଦେଇଛି । ଏହି କମ୍ପାନୀରେ ସାରା ବିଶ୍ବରେ ୨.୪୨ ଲକ୍ଷ କର୍ମଚାରୀ କାମ କରୁଛନ୍ତି । ବର୍ତମାନ ସେମାନଙ୍କ ମଧ୍ୟରୁ ପ୍ରାୟ ୮୦ ହଜାର କର୍ମଚାରୀଙ୍କୁ ଘରୁ କାମ କରିବାକୁ ଅନୁମତି ଦିଆଯାଇଛି ।
