ଅଲିଭ୍ ରିଡ଼ଲେଙ୍କ ସୁରକ୍ଷା: ଧାମରା, ଦେବୀ ଓ ଋଷିକୂଲ୍ୟା ମୁହାଣରେ ମାଛଧରା ଉପରେ ନିଷେଧାଦେଶ

ମେ ମାସ ଶେଷ ପର୍ଯ୍ୟନ୍ତ ନିଷେଧାଦେଶ ବଳବତ୍ତର

ପ୍ରଭାବିତ ହେବେ ୧୦୬୬୬ ପାରମ୍ପରିକ ମତ୍ସ୍ୟଜୀବୀ

କ୍ଷତିଗ୍ରସ୍ତ ମତ୍ସ୍ୟଜୀବୀଙ୍କୁ ମିଳିବ ୭୫୦୦ କ୍ଷତିପୂରଣ

ଅଲିଭରିଡ଼ଲେ କଇଁଛଙ୍କ ପ୍ରଜନନ ଓ ଅଣ୍ଡାଦାନକୁ ସୁରକ୍ଷିତ ରଖିବା ନିମନ୍ତେ ସରକାର ରବିବାର ଧାମରା, ଦେବୀ ଓ ଋଷିକୂଲ୍ୟା ମୁହାଣରେ ମାଛମରା ଉପରେ ନିଷେଧାଦେଶ ଜାରି କରିଛନ୍ତି । ଆସନ୍ତା ମେ ମାସ ପର୍ଯ୍ୟନ୍ତ ଏହି ପ୍ରତିବନ୍ଧକ ବଳବତ୍ତର ରହିବ।  ଓଡ଼ିଶା ସାମୁଦ୍ରିକ ମତ୍ସ୍ୟ ନିୟନ୍ତ୍ରଣ ନିୟମ (OMFRA) ୧୯୮୨ ଏବଂ ବନ୍ୟଜନ୍ତୁ ସୁରକ୍ଷା ଆଇନ ୧୯୭୨ ର ବ୍ୟବସ୍ଥା ଅନୁସାରେ ଏହି ପଦକ୍ଷେପ ନିଆଯାଇଥିବା ସୂଚନା ମିଳିଛି ।

ଏହା ତଟରକ୍ଷୀ ବାହିନୀ ବ୍ୟତୀତ ଜଙ୍ଗଲ, ମତ୍ସ୍ୟସମ୍ପଦ ଏବଂ ସାମୁଦ୍ରିକ ପୁଲିସ ଏହି ଅଞ୍ଚଳରେ ପାଟ୍ରୋଲିଂ କରିବ ଏବଂ ଅଲିଭରିଡ଼ଲେଙ୍କ ସୁରକ୍ଷା ନିମନ୍ତେ ୬୧ ଉପକୂଳ ଶିବିର ସ୍ଥାପନ ହେବ । ଏହା ସହ ଉପକୂଳରେ ୫ଟି ଅନ୍ୟ ଶିବିର ମଧ୍ୟ ଏହାକୁ ନିୟନ୍ତ୍ରିତ କରିବ । ଏଥିରେ ସଶସ୍ତ୍ର ପୁଲିସ ଓ ଜଙ୍ଗଲ ବିଭାଗର ଅଧିକାରୀମାନେ ନିଯୁକ୍ତ ହେବେ । କଇଁଛମାନଙ୍କର ନିରାପତ୍ତା ସୁନିଶ୍ଚିତ କରିବା ପାଇଁ, ନିଷେଧାଦେଶ ଆଦେଶକୁ କଠୋର ଭାବେ କାର୍ଯ୍ୟକାରୀ କରାଯାଉଛି। ନିଷିଦ୍ଧ ଜଳ ଅଞ୍ଚଳରେ ପ୍ରବେଶ ନକରିବାକୁ ଟ୍ରଲର ଅପରେଟରମାନଙ୍କୁ ଚେତାବନୀ ଦିଆଯାଇଛି। ଅନ୍ୟପକ୍ଷରେ ଏହି ନିଷେଧାଦେଶ ଯୋଗୁଁ ପ୍ରାୟ ୧୦୬୬୬ ମତ୍ସ୍ୟଜୀବୀ ପରିବାର ପ୍ରଭାବିତ ହେବେ । ସେମାନଙ୍କ ନିମନ୍ତେ ରାଜ୍ୟ ସରକାର କ୍ଷତିପୂରଣ ବାବଦରେ ଏକକାଳୀନ ୭୫୦୦ ଟଙ୍କା ଜୀବିକା ସହାୟତା ପ୍ରଦାନ କରିବେ ।

ଉଲ୍ଲେଖଯୋଗ୍ୟ ଯେ ଗତବର୍ଷ ୭.୩ ଲକ୍ଷ ଅଲିଭ ରିଡ଼ଲେ କଇଁଛ ଅଣ୍ଡା ଦେବା ନିମନ୍ତେ ଏହି ଉପକୂଳଗୁଡ଼ିକୁ ଆସିଥିଲେ । କଇଁଚମାନେ ସାଧାରଣତ ରାତିରେ ସମୁଦ୍ରକୂଳରେ ବସାକରି ଅଣ୍ଡା ଦେଇଥାଆନ୍ତି । ଅଣ୍ଡା ଦେବାର ଦେଢ଼ରୁ ୨ ମାସ ମଧ୍ୟରେ ଏଥିରୁ ଶାବ ବାହାରିଥାଆନ୍ତି ।