ଲକ୍ଷ୍ନୌ : ଉତ୍ତରପ୍ରଦେଶ ହାଥରସ୍ ଗଣବଳାତ୍କାର ଓ ହତ୍ୟାର ଶିକାର ଯୁବତୀଙ୍କ ପରିବାର ସଦସ୍ୟ ସୋମବାର ଆହ୍ଲାବାଦ ହାଇକୋର୍ଟରେ ବୟାନ ରେକର୍ଡ କରାଇଛନ୍ତି। ଆହ୍ଲାବାଦ ହାଇକୋର୍ଟଙ୍କ ଲକ୍ଷ୍ନୌ ପୀଠ ନିକଟରେ ପୀଡିତାଙ୍କ ପିତାମାତା ଓ ତିନି ଭାଇ ହାଜର ହୋଇ ବୟାନ ରେକର୍ଡ କରାଇଛନ୍ତି। ପୀଡିତାଙ୍କ ପରିବାର ପକ୍ଷରୁ ଓକିଲ ସୀମା ଖୁସୱା ମାମଲାର ବିଚାର ରାଜ୍ୟ ବାହାରେ କରିବାକୁ ଅଦାଲତଙ୍କୁ ନିବେଦନ କରିଛନ୍ତି। ଏହା ସହିତ ପୀଡିତାଙ୍କ ପରିବାର ସଦସ୍ୟଙ୍କୁ ମାମଲାର ବିଚାର ଶେଷ ପର୍ଯ୍ୟନ୍ତ ସୁରକ୍ଷା ଯୋଗାଇଦେବାକୁ ନିବେଦନ କରିଛନ୍ତି। ସେହିପରି ସିବିଆଇ ତଦନ୍ତର ତଥ୍ୟକୁ ଗୋପନୀୟ ରଖିବାକୁ ପୀଡିତାଙ୍କ ପରିବାର ପକ୍ଷରୁ ଓକିଲ ସୀମା ଦାବି କରିଛନ୍ତି। ଆଜିର ଶୁଣାଣି ପାଇଁ ହାଇକୋର୍ଟ ଗୃହ ବିଭାଗ ଅତିରିକ୍ତ ସଚିବ, ପୁଲିସ ମହାନିର୍ଦେଶକ, ଅତିରିକ୍ତ ପୁଲିସ ମହାନିର୍ଦେଶ (ଆଇନ, ଶୃଙ୍ଖଳା), ହାଥରସ ଜିଲାପାଳ ଓ ହାଥରସ ଏସପିଙ୍କୁ ସମନ ଜାରି କରିଥିଲେ। ମାମଲାର ତଦନ୍ତର ସ୍ଥିତାବସ୍ଥା ସମ୍ପର୍କରେ ରିପୋର୍ଟ ଦେବାକୁ ଏହି ଅଧିକାରୀଙ୍କୁ ନିର୍ଦେଶ ଦିଆଯାଇଥିଲା। ଜିଲାପାଳ ଘଟଣା ସମ୍ପର୍କରେ ରିପୋର୍ଟ ଦାଖଲ କରିଥିବାବେଳେ ପରବର୍ତ୍ତୀ ଶୁଣାଣି ପାଇଁ ନଭେମ୍ବର ୨କୁ ଦିନ ଧାର୍ଯ୍ୟ କରାଯାଇଛି। ହାଥରସ ଘଟଣା ଉପରେ ଅକ୍ଟୋବର ୧୫ରେ ସୁପ୍ରିମକୋର୍ଟ ଶୁଣାଣି କରିବାକୁ ଦିନ ଧାର୍ଯ୍ୟ କରିଛନ୍ତି। ସୁପ୍ରିମକୋର୍ଟ ଏହି ଘଟଣାର ତିନିଟି ଦିଗ ଉପରେ ଶୁଣାଣି କରିବେ। ପ୍ରଥମଟି ହେଲା ପୀଡିତାଙ୍କ ପରିବାର ଓ ସାକ୍ଷୀଙ୍କ ପାଇଁ କି ପ୍ରକାର ସୁରକ୍ଷା ବ୍ୟବସ୍ଥା କରାଯାଇଛି। ଆହ୍ଲାବାଦ ହାଇକୋର୍ଟରେ ମାମଲର ଶୁଣାଣି ସ୍ଥିତାବସ୍ଥା ଓ ପୀଡିତାଙ୍କ ପରିବାରକୁ ଉପଯୁକ୍ତ ଓକିଲ ଯୋଗାଇ ଦିଆଯାଇଛି କି ନାହିଁ ତାହା ଉପରେ ସୁପ୍ରିମକୋର୍ଟ ଶୁଣାଣି କରିବେ। ଅନ୍ୟପଟେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ କହିଛନ୍ତି ଯେ କୌଣସି ବ୍ୟକ୍ତିକୁ ନ୍ୟାୟର ବଞ୍ଚିତ ହେବାକୁ ଦିଆଯିବ ନାହିଁ।
Popular Categories
Previous article
Next article