ନିଲଗିରି: ବାରମ୍ବାର ଜଣେ ଅପରାଧୀ କିଛି କଥା ନଥାଇ ଗାଳିଗୁଲଜ କରିବା, ମରଣାନ୍ତକ ଆକ୍ରମଣ କରିବା ଘଟଣାରେ ଅଞ୍ଚଳବାସୀ ଅତିଷ୍ଠ ହୋଇ ପଡିଛନ୍ତି। ସମ୍ପୃକ୍ତ ଅପରାଧୀର ଅପରାଧ ଦୁନିଆ ଖତମ କରିବା ଉଦେଶ୍ୟରେ ଗାଁ ର ଶତାଧିକ ମହିଳା ଓ ପୁରୁଷ ମଙ୍ଗଳବାର ରାତିରୁ ଅପରାଧୀ ଘରକୁ ଘେରାଉ କରିଛନ୍ତି। ବାଲେଶ୍ଵର ଜିଲା ନୀଳଗିରି ଥାନା ଅଞ୍ଚଳରେ ଏଭଳି ଉତେଜନାମୂଳକ ଘଟଣା ଦେଖିବାକୁ ମିଳିଛି।
ନୀଳଗିରି-ପଞ୍ଚଲିଙ୍ଗେଶ୍ୱର ରାସ୍ତାର ନିସ୍ଚନ୍ଦପୁର ଗାଁର ବିଶ୍ଵଜିତ ଦଳେଇ ଓରଫ ରାଜା ସେହିଅଞ୍ଚଳର ଭରତ ଚନ୍ଦ୍ର ପାତ୍ର ନାମକ ବ୍ୟକ୍ତିଙ୍କୁ ମାଡ଼ମାରିବା ସହ ଜୀବନରୁ ମାରିଦେବାର ଧମକ ଦେଇଥିଲା। ପାଟିତୁଣ୍ଡ ଶୁଣି ଗ୍ରାମବାସୀ ମାନେ ଦୌଡ଼ି ଆସିବାରୁ ରାଜାର ଏଭକି ବାରମ୍ବାର ଆକ୍ରମଣକୁ ବିରୋଧ କରିଥିଲେ। କିଛି ଦିନ ଆଗରୁ ଜଣେ ମହିଳାଙ୍କୁ ତାଙ୍କ ଦୋକାନରେ ଗାଳିଗୁଲଜ କରିବା ସହ ମାଡ଼ ମାରିବା, ଅନ୍ୟ ଜଣେ ବ୍ୟକ୍ତିଙ୍କୁ ଭୁଜାଲିରେ ମୁଣ୍ଡକୁ ହାଣି ଆଖି ନଷ୍ଟ କରିଥିଲା। ପୁଣି ଗାଁରେ ଅନୁରୂପ ଆକ୍ରମଣକୁ ବିରୋଧ କରି ରାଜାକୁ ମାଡ଼ ମାରିବାକୁ ଗ୍ରାମବାସୀ ଗୋଡାଇଥିଲେ। ହାତରେ ଠେଙ୍ଗା ଦେଖି ରାଜା ତାଙ୍କ ଘରକୁ ଦୌଡ଼ି ପଳାଇଯାଇଥିଲା। ତେବେ ଉତ୍ୟେକ୍ତ ଗ୍ରାମବାସୀ ତାଙ୍କ ଘରକୁ ଘେରାଉ କରି ରଖିଥିଲେ। ଘଟଣା ସ୍ଥଳକୁ ନୀଳଗିରି ପୁଲିସ ଯାଇ ଗ୍ରାମବାସୀଙ୍କୁ ବୁଝାଇଥିଲେ ବି କେହି ଶୁଣି ନଥିଲେ। ବୁଧବାର ସକାଳେ ପୁଣିଥରେ ଉକ୍ତ ଗାଁରେ ଉତ୍ୟକ୍ତ ଲୋକଙ୍କ ମେଳି ବାନ୍ଧି ଥିବା ବେଳେ ରାସ୍ତାରୋକ କରା ଯାଇଛି। ଖବର ପାଇ ନୀଳଗିରି ଆଇଆଇସି ମିନତି ବିଶ୍ୱାଳ ଙ୍କ ନିର୍ଦ୍ଦେଶ ରେ ୧ପ୍ଲାଟୁନ ପୁଲିସ ଫୋର୍ସ ମୁତୟନ କରା ଯାଇଛି। ଉତ୍ୟକ୍ତ ଲୋକେ ଏହି ଅପରାଧୀକୁ ମାରି ଆଇନକୁ ହାତକୁ ନେବେ ବୋଲି ସ୍ଥିର କରିଥିବା ବେଳେ ପୁଲିସ ଏହି ଅପରାଧୀକୁ କାବୁ କରି ଆଣିବାକୁ ପ୍ରୟାସ ଜାରି ରଖିଛି। ତେବେ ଏ ନେଇ ଅଧିକ ଉତେଜନା ଲାଗି ରହିଥିବା ଦେଖିବାକୁ ମିଳିଛି।
