ଥରେ ନୁହେଁ, ଦୁଇଦୁଇଥର ସିଭିଲ୍ ସର୍ଭିସ ପରୀକ୍ଷାରେ ଉତ୍ତୀର୍ଣ୍ଣ ହେଲେ । ଆଇପିଏସ୍ ପାହ୍ୟା ମିଳିଲା । ହେଲେ ନିଧି ବଂଶଲଙ୍କ ସ୍ବପ୍ନ ଓ ଲକ୍ଷ୍ୟ ଥିଲା ଭିନ୍ନ । ଆଇପିଏସ୍ ନୁହେଁ, ଆଇଏଏସ୍ ହେବାର ସ୍ବପ୍ନ ଥିଲା ତାଙ୍କର ଆଉ ଏଥିପାଇଁ ସେ ଚଳାଇଥିଲେ ଉଦ୍ୟମ । ଶେଷରେ ତାଙ୍କ ଲକ୍ଷ୍ୟ ସାକାର ହେଲା । ଗତକାଲି ୟୁପିଏସସି ପରୀକ୍ଷାରେ ୨୩ତମ ସ୍ଥାନ ଅଧିକାର କରିଥିବା ନିଧି ବଂଶଲଙ୍କ କାହାଣୀ ଟିକିଏ ଭିନ୍ନ । ସେ ସାରା ଦେଶରେ କେବଳ ୨୩ତମ ସ୍ଥାନ ସହ ନିଜ ରାଜ୍ୟ ମଧ୍ୟପ୍ରଦେଶରେ ଦ୍ବିତୀୟ ସ୍ଥାନ ଅଧିକାର କରିଛନ୍ତି । ଅବଶ୍ୟ ଏଥିପାଇଁ ଢ଼େର ଉଦ୍ୟମ କରିବାକୁ ପଡ଼ିଛି । ୫ମଥର ପରୀକ୍ଷା ଦେବା ପରେ ତାଙ୍କୁ ଏହି ସଫଳତା ମିଳିଛି ।
ନିଧିଙ୍କ ସୂଚନା ଅନୁସାରେ ସେ ପିଲାଦିନରୁ ଆଇଏଏସ୍ ହେବାକୁ ସ୍ବପ୍ନ ଦେଖୁଥିଲେ । ଏଥିପାଇଁ ପ୍ରସ୍ତୁତି କରିଥିଲେ । ୨ଥର ଆଇପିଏସ୍ ପାଇଥିଲେ । ମାତ୍ର ତାଙ୍କ ମୁଣ୍ଡରେ ଆଇଏଏସ୍ ହେବାର ଭୂତ ପଶିଥିଲା । ସେଥିପାଇଁ ସେ ଚେଷ୍ଟା ଚଳାଉଥିଲେ । ଶେଷରେ ଏଥର ସଫଳତା ତାଙ୍କ ହାତରେ ଲାଗିଥିଲା । ଏହା ପୂର୍ବରୁ ସେ ଦ୍ବିତୀୟ ପ୍ରଚେଷ୍ଟାରେ ୨୦୧୬ରେ ଆଇପିଏସ୍ ପାଇଥିଲେ । ଝାଡ଼ଖଣ୍ଡରେ ଅତିରିକ୍ତ ଏସପି ଭାବରେ ନିଯୁକ୍ତି ପାଇଥିଲେ । ପୁନର୍ବାର ୨୦୧୭ରେ ମଧ୍ୟ ସେ ଆଇପିଏସ୍ କ୍ୟାଡ଼ର ନିମନ୍ତେ ବଛା ଯାଇଥିଲେ । ୨୦୧୮ରେ ସେ ପୁଣି ସିଭିଲ୍ ସର୍ଭିସ ପରୀକ୍ଷା ଦେଇଥିଲେ । ମାତ୍ର ଦୁର୍ଯୋଗକୁ ସେ କୌଣସି ରାଙ୍କ ପାଇ ନ ଥିଲେ । ମାତ୍ର ସେ ହାରି ଯାଇ ନ ଥିଲେ ଓ ୨୦୧୯ରେ ୫ମ ଥର ପାଇଁ ପ୍ରସ୍ତୁତି ଆରମ୍ଭ କରିଥିଲେ ।
ଚଳିତ ଥର ସେ ସର୍ବଭାରତୀୟସ୍ତରରେ ୨୩ ତମ ସ୍ଥାନ ଦଖଲ କରିଛନ୍ତି ଓ ତାଙ୍କର ଆଇଏଏସ୍ ହେବା ସ୍ବପ୍ନ ସଫଳ ହୋଇଛି । ପିତା ଗିରିରାଜ ବଂଶଲଙ୍କ ସୂଚନା ଅନୁସାରେ ନିଧି ୨୦୧୧ରେ ଚେନ୍ନଇରୁ ବିଟେକ୍ ଡ଼ିଗ୍ରୀ ପରେ ୨୦୧୩ରେ ବେଙ୍ଗାଲୁରରେ ଚାକିରି ଆରମ୍ଭ କରିଥିଲେ । କିନ୍ତୁ ସେ ଚାକିରି ଛାଡ଼ି ଦିଲ୍ଲୀରେ ସିଭିଲ୍ ସର୍ଭିସ ପାଇଁ ପ୍ରସ୍ତୁତି କରିବା ଆରମ୍ଭ କରିଥିଲେ । ୨୦୧୬ରେ ସେ ଆଇପିଏସ୍ ପାଇଥିଲେ ।
