ଅନୁଗୋଳ: ଅନୁଗୋଳ ସହରର ଏକ ମଦ ଦୋକାନ ଏବେ ପ୍ରଶାସନ ପାଇଁ ମୁଣ୍ଡ ବିନ୍ଧାର କାରଣ ସାଜିଛି। ଏହି ମଦ ଦୋକାନ ଯୋଗୁ ସହରରେ କରୋନା ଭୂତାଣୁ ବ୍ୟାପିବାରେ ଲାଗିଛି, ଯାହା ଗୋଷ୍ଠୀ ସଂକ୍ରମଣର ଆଶଙ୍କାକୁ ବଢ଼ାଇ ଦେଇଛି। ପ୍ରଥମେ ଏହି ଦୋକାନର ୩ ଜଣ ସେଲ୍ସମ୍ୟାନ କରୋନାରେ ଆକ୍ରାନ୍ତ ହୋଇଥିଲେ। ପରେ ଦୋକାନ୍ ଲିଙ୍କ୍ରୁ ଆଉ ୪ ଜଣ ପଜିଟିଭ୍ ବାହାରିଥିବା ଜଣାପଡ଼ିଛି। ସେଥିରେ ୨ ଜଣ ଅବକାରୀ ବିଭାଗ ଅଧିକାରୀ ରହିଛନ୍ତି। ଅନ୍ୟ ୨ ଜଣଙ୍କ ମଧ୍ୟରେ ମଦ ଦୋକାନ ଗାଡ଼ି ଚାଳକ ଓ ତାଙ୍କ ପତ୍ନୀ ରହିଛନ୍ତି। ଚିନ୍ତାର ବିଷୟ ହେଉଛି ଅବକାରୀ ବିଭାଗର ୨ ଅଧିକାରୀ ବହୁ ଲୋକଙ୍କ ସହିତ ମିଶିଥିବାବେଳେ ଡ୍ରାଇଭର ଏବଂ ତାଙ୍କ ପତ୍ନୀଙ୍କ ଯୋଗୁ ସ୍ଥାନୀୟ ସଂକ୍ରମଣ ବଢ଼ିବା ସମ୍ଭାବନା ରହିଛି। ପ୍ରଶାସନ ଉକ୍ତ ମଦ ଦୋକାନକୁ ସିଲ୍ କରିଦେଇଥିବା ସୂଚନା ମିଳିଛି।
ଗତ ୧୯ ତାରିଖରେ ମଦ ଦୋକାନର ୩ ଜଣ ସେଲ୍ସମ୍ୟାନ କରୋନାରେ ଆକ୍ରାନ୍ତ ହୋଇଥିବା ଜଣାପଡ଼ିବା ପରେ ସହରରେ ଭୟର ବାତାବରଣ ସୃଷ୍ଟି ହୋଇଥିଲା। କାରଣ ସେଲ୍ସମ୍ୟାନଙ୍କ ସମ୍ପର୍କରେ ବହୁ ଗ୍ରାହକ ଓ ଅନ୍ୟାନ୍ୟ ଲୋକ ଆସିଥିବେ ନିଶ୍ଚୟ। ତେବେ ଏହା ପରେ ମଦ ଦୋକାନ ଗାଡ଼ି ଚାଳକଙ୍କ ପରିବାରର କରୋନା ପରୀକ୍ଷା କରାଯାଇଥିଲା, ଯେଉଁଥିରେ ଡ୍ରାଇଭର ଏବଂ ତାଙ୍କ ପତ୍ନୀ ସଂକ୍ରମିତ ହୋଇଥିବା ଜଣାପଡ଼ିଥିଲା। କିନ୍ତୁ ସେମାନଙ୍କ ପୁଅ ଓ ଝିଅଙ୍କ ରିପୋର୍ଟ ନେଗେଟିଭ୍ ଆସିଥିଲା। ଏହା ସତ୍ବେ ପୁଅ-ଝିଅଙ୍କୁ ୭ ଦିନିଆ ହୋମ୍ କ୍ବାରେଣ୍ଟାଇନରେ ରହିବାକୁ କୁହାଯାଇଛି। ଅନ୍ୟପଟେ କରୋନା ପଜିଟିଭ ଚିହ୍ନଟ ହୋଇଥିବା ଅବକାରୀ ବିଭାଗର ୨ ଅଧିକାରୀଙ୍କୁ ନେଇ ଚିନ୍ତାରେ ପଡ଼ିଛି ଜିଲା ପ୍ରଶାସନ। ସେମାନେ ଅନେକ ଅଧିକାରୀ ଏବଂ ଲୋକଙ୍କ ସହିତ ମିଶିଥିବା କୁହାଯାଉଛି। ତେଣୁ ସମସ୍ତଙ୍କ କଣ୍ଟାକ୍ଟ ଟ୍ରେସ କରି ପରିସ୍ଥିତିକୁ ନିୟନ୍ତ୍ରଣ କରିବା ପ୍ରଶାସନ ପାଇଁ ଏକ ପ୍ରକାର ଚ୍ୟାଲେଞ୍ଜ ହୋଇଛି।
