ଇରାନର ଚାବାହାର ରେଳ ପ୍ରକଳ୍ପରୁ ଭାରତକୁ ବାଦ ଦିଆଯାଇ ନାହିଁ । ଏ ସମ୍ପର୍କରେ ଲୋକଙ୍କ ମନରେ ଏକ ଭୁଲ ଧାରଣା ପ୍ରବେଶ କରାଯାଉଛି । କିଛି ଦେଶ ଓ କିଛି ଗଣମାଧ୍ୟମ ଭାରତ-ଇରାନ ସମ୍ପର୍କରେ ଫାଟ ସୃଷ୍ଟି କରିବାକୁ ଉଦ୍ୟମ କରୁଛନ୍ତି ବୋଲି ଇରାନ ପକ୍ଷରୁ କୁହାଯାଇଛି । ଚାବାହର ବନ୍ଦରକୁ ଜାହଦାନ ସହର ସହିତ ସଂଯୋଗ କରିବା ପାଇଁ ରେଳ ଲାଇନ ନିର୍ମାଣ ପାଇଁ ଭାରତ-ଇରାନ ମଧ୍ୟରେ ବୁଝାମଣା ହୋଇଛି। ଏହି ରେଳପଥ ମାଧ୍ୟମରେ ଭାରତ ଇରାନ ସହାୟତାରେ ଆଫଗାନିସ୍ତାନ ସମେତ କେନ୍ଦ୍ର ଏସିଆରେ ଅବସ୍ଥିତି ଦେଶରେ ପହଞ୍ଚିବାକୁ ଯୋଜନା ରଖିଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କର ପ୍ରଥମ କାର୍ଯ୍ୟକାଳ ସମୟରେ ଇରାନ ଗସ୍ତ କରିଥିଲେ ଓ ଏହି ଅବସରରେ ଭାରତ-ଇରାନ-ଆଫଗାନୀସ୍ଥାନ ମଧ୍ୟରେ ଚାବାହାର ବନ୍ଦର ନିର୍ମାଣ ନେଇ ତ୍ରିପାକ୍ଷିକ ଚୁକ୍ତି ସ୍ବାକ୍ଷରିତ ହୋଇଥିଲା ।
ଗତ କିଛିଦିନ ହେଲା ଇରାନ ଭାରତଠାରୁ ଦୂରେଇ ଚୀନର ନିକଟତର ହେଉଥିବା କିଛି ଖବର ଦେଶ ବିଦେଶ ଗଣମାଧ୍ୟମରେ ପ୍ରକାଶ ପାଇଛି । ମାତ୍ର ଏଥିରେ କୌଣସି ସତ୍ୟତା ନାହିଁ ବୋଲି ଉଲ୍ଲେଖ କରି ଭାରତୀୟ ରାଷ୍ଟ୍ରଦୂତଙ୍କୁ ଏ ସମ୍ପର୍କରେ ଆଲୋଚନା ନିମନ୍ତେ ଇରାନ ସରକାର ନିମନ୍ତ୍ରଣ କରିଛନ୍ତି । ଇରାନ ସରକାରଙ୍କ ଉପମନ୍ତ୍ରୀ ସୟଦ ରସୋଲି ଭାରତୀୟ ରାଷ୍ଟ୍ରଦୂତଙ୍କ ସହ ଏହି ପ୍ରସଙ୍ଗରେ ଆଲୋଚନା କରିବା ସହ ଚାବାହାର-ଜାହଦାନ ରେଳ ପ୍ରକଳ୍ପର ଅଗ୍ରଗତି, ସହଯୋଗ ବୃଦ୍ଧି ନେଇ ବିସ୍ତୃତ ସମୀକ୍ଷା କରିଛନ୍ତି ।
ଏନେଇ ମନ୍ତ୍ରୀ ରସୋଲି କହିଛନ୍ତି ଚାବାହାର-ଜାହଦାନ ରେଳ ପ୍ରକଳ୍ପରୁ ଭାରତକୁ ବାଦ ଦିଆଯିବା ଖବରରେ କୌଣସି ସତ୍ୟତା ନାହିଁ। କେତେକ ବାହ୍ୟ ଶକ୍ତି ଏପରି ମିଥ୍ୟା ଖବର ପ୍ରସାର କରି ଦୁଇ ଦେଶ ମଧ୍ୟରେ ଦୂରତା ବଢାଇବାକୁ ଚେଷ୍ଟା କରିଛନ୍ତି। ହେଲ ସେମାନଙ୍କ ଚାଲିଥିବା ଏହି ଷଡଯନ୍ତ୍ର କେବେ ହେଲେ ସଫଳ ହେବ ନାହିଁ । ବର୍ତ୍ତମାନ ଇରାନ ଏ ମାମଲାରେ ଥିବା ଗୁଜବକୁ ଦୂର କରିବା ଲାଗି ଇରାନ ପକ୍ଷରୁ ଉଦ୍ୟମ କରାଯିବା ସହ ଭାରତ ସହ ଆଲୋଚନା କରିବା ଲାଗି ବୁଝାମଣା କରିବାକୁ ପ୍ରସ୍ତୁତି ଆରମ୍ଭ କରିଛି।
