ସରକାର ଭାଙ୍ଗିବାକୁ ଷଡ଼ଯନ୍ତ୍ର କରୁଛି ବିଜେପି: ସୁରଜେୱାଲା

ନୂଆଦିଲ୍ଲୀ: ରାଜସ୍ଥାନରେ କଂଗ୍ରେସ ସରକାର ଭାଙ୍ଗିବାକୁ ବିଜେପି ଷଡ଼ଯନ୍ତ୍ର କରୁଛି। ଏହାର ପ୍ରମାଣ ମିଳିସାରିଛି ବୋଲି କଂଗ୍ରେସର ରାଷ୍ଟ୍ରୀୟ ମୁଖପାତ୍ର ରଣଦୀପ ସୁରଜେୱାଲା ଶୁକ୍ରବାର ଏକ ସାମ୍ବାଦିକ ସମ୍ମିଳନୀରେ କହିଛନ୍ତି। ସେ କହିଛନ୍ତି, ଗୁରୁବାର ରାତିରେ ୨ଟି ଅଡିଓ ଟେପ୍‌ ସାମ୍ନାକୁ ଆସିଛି। ଏଥିରେ କଂଗ୍ରେସ ନେତା ଭମ୍ବର ଲାଲ ଶର୍ମା ଏବଂ ବିଜେପି ନେତା ସଞ୍ଜୟ ଜୈନଙ୍କ ବାର୍ତ୍ତାଳାପ ରହିଛି। ବାର୍ତ୍ତାଳାପରେ ଭମ୍ବର ଲାଲ କହୁଛନ୍ତି ଟଙ୍କା ପରିମାଣ ଛିଣ୍ଡି ଯାଇଛି। ଏହାର ଉତ୍ତରରେ ସଞ୍ଜୟ କହୁଛନ୍ତି ଯେ, ହଁ ସାହାବଙ୍କୁ କହିଦେଇଛି। ରାଜସ୍ଥାନ ସରକାର ଏବଂ ସ୍ପେଶାଲ ଅପରେଶନ ଗ୍ରୁପ(ଏସଓଜି) ଏ ନେଇ ଏତଲା ରୁଜୁ କରି ଦୋଷୀଙ୍କୁ ଗିରଫ କରିବାକୁ ଦାବି କରୁଛି। କାରଣ ସରକାର ଭାଙ୍ଗିବା ପଛରେ ବିଜେପିର ଷଡ଼ଯନ୍ତ୍ର ନେଇ ବହୁତ ପ୍ରମାଣ ମିଳିସାରିଛି ବୋଲି ସୁରଜେୱାଲା କହିଛନ୍ତି।

ସେହିପରି ସୁରଜେୱାଲା କେନ୍ଦ୍ରମନ୍ତ୍ରୀ ଗଜେନ୍ଦ୍ର ସିଂହ ଶେଖାୱତଙ୍କ ବିରୋଧରେ ଏସଓଜି ଦ୍ବାରା ଏତଲା ରୁଜୁ କରି ଅଡିଓ ଟେପ୍‌ର ଯାଞ୍ଚ କରିବାକୁ କହିଛନ୍ତି। ଯଦି ଶେଖାୱତ ତଦନ୍ତକୁ ପ୍ରଭାବିତ କରିବାର ସନ୍ଦେହ ରହିଛି, ତେବେ ତାଙ୍କ ବିରୋଧରେ ୱାରେଣ୍ଟ ଜାରି କରି ତାଙ୍କୁ ତୁରନ୍ତ ଗିରଫ କରାଯିବା ଦରକାର। କଂଗ୍ରେସ ନେତା ଭମ୍ବର ଲାଲ ଏବଂ ବିଜେପି ନେତା ସଞ୍ଜୟଙ୍କ ବିରୋଧରେ ମାମଲା ରୁଜୁ କରାଯାଉ। ବିଧାୟକମାନଙ୍କୁ ଲାଞ୍ଚ ଦେବା ଲାଗି କିଏ କଳାଧନର ବ୍ୟବସ୍ଥା କରିଛି ଏବଂ କାହାକୁ ଲାଞ୍ଚ ଦିଆଯାଇଛି ତାହାର ବି ତଦନ୍ତ ହେଉ ବୋଲି ସୁରଜେୱାଲା ଦାବି କରିଛନ୍ତି।