ନୂଆଦିଲ୍ଲୀ: ଏକାନ୍ତବାସ, ସଙ୍ଗରୋଧ, ଲକ୍ଡ଼ାଉନ ପରି ପଦକ୍ଷେପ ଗ୍ରହଣ କରି ସରକାର ଓ ପ୍ରଶାସନ କରୋନା ସଂକ୍ରମଣକୁ ରୋକିବାକୁ ଉଦ୍ୟମ କରୁଛନ୍ତି । ଏହା ସତ୍ତ୍ବେ କରୋନା ସଂକ୍ରମିତଙ୍କ ସଂଖ୍ୟା ପ୍ରତିଦିନ ବଢ଼ିବାରେ ଲାଗିଛି । ମୃତ୍ୟୁ ଅନୁପାତ ଅନ୍ୟ ଦେଶ ତୁଳନାରେ କମ୍ ହୋଇଥିଲେ ମଧ୍ୟ ଏହା ଚିନ୍ତାଜନକ ସ୍ଥିତିରେ ପହଞ୍ଚିଲାଣି । ଦେଶରେ ମୃତ୍ୟୁସଂଖ୍ୟା ପାଖାପାଖି ୧୮୦୦ ହେଲାଣି । ଅନ୍ୟପକ୍ଷରେ କରୋନା ସଂକ୍ରମଣକୁ ନେଇ ପଶ୍ଚିମବଙ୍ଗ ପରି କିଛି ରାଜ୍ୟ ସବିଶେଷ ତଥ୍ୟ ପ୍ରଦାନ କରୁ ନ ଥିବା ଅଭିଯୋଗ ହୋଇଛି । ଏପରିକି ମହାରାଷ୍ଟ୍ରଠାରୁ ପଶ୍ଚିମବଙ୍ଗରେ ସଂକ୍ରମଣ ଅଧିକ ଏବଂ ଏ କଥାକୁ ମମତା ସରକାର ଗୋପନ ରଖିଥିବା ମଧ୍ୟ ଅଭିଯୋଗ ହୋଇଛି । ନିଜେ ପଶ୍ଚିମବଙ୍ଗ ରାଜ୍ୟପାଳ ମଧ୍ୟ ଏ ପରି ଆଶଙ୍କା କରିଛନ୍ତି । ଏହି ସ୍ଥିତିରେ ଦିଲ୍ଲୀ ଏମ୍ସ ନିର୍ଦେଶକ ଡ଼ା. ରଣଦୀପ ଗୁଲେରିଆ ଅତ୍ୟନ୍ତ ଚିନ୍ତାଜନକ ଭବିଷ୍ୟତ ଆକଳନ କରିଛନ୍ତି । ସେ କହିଛନ୍ତି ଯେ କରୋନା ସଂକ୍ରମଣରେ ଅଙ୍କୁଶ ଲଗାଇବା ସମ୍ଭବ ହେଉନାହିଁ । ଯଦି ଏପରି ସ୍ଥିତି ଲାଗି ରହେ ତେବେ ଜୁନ୍ ଓ ଜୁଲାଇ ମାସ ବେଳକୁ ଏହା ଅସମ୍ଭାଳ ସ୍ଥିତିରେ ପହଞ୍ଚିବ । ଏହି ଦୁଇମାସରେ ବହୁ ଲୋକ କରୋନା ସଂକ୍ରମିତ ହୋଇପାରନ୍ତି ବୋଲି ସେ ଆକଳନ କରିଛନ୍ତି ।
According to modeling data&the way our cases are increasing, it is likely that peak can come in June&July. But there are many variables&with time only we will know how much they are effective&the effect of extending the lockdown: Randeep Guleria, AIIMS Director #COVID19 pic.twitter.com/G28on79Wzy
— ANI (@ANI) May 7, 2020
ଏଏନଆଇ ଅନୁଯାୟୀ ଦେଶରେ କରୋନା ସଂକ୍ରମିତଙ୍କ ସଂଖ୍ୟା ଯେପରି ବଢିବାରେ ଲାଗିଛି ସେଥିରୁ ଜୁନ୍ ଓ ଜୁଲାଇରେ ଏହା ଚରମରେ ରହିବ ବୋଲି ଡ. ରଣଦୀପ ଗୁଲେରିଆ କହିଛନ୍ତି । ଏହି ଦୁଇ ମାସରେ ଦେଶରେ ସର୍ବାଧିକ କରୋନା ସଂକ୍ରମିତ କେସ୍ ସାମ୍ନାକୁ ଆସିପାରେ । ଗୁଲେରିଆଙ୍କ ଅନୁଯାୟୀ ଜୁନ୍ ଓ ଜୁଲାଇରେ କୋଭିଡ୍-୧୯ ସଂକ୍ରମଣ ଚରମରେ ପହଞ୍ଚିବା ପରେ ଏହାର ପ୍ରକୋପ ହ୍ରାସ ଘଟିପାରେ। କିନ୍ତୁ ଏହା ବାସ୍ତବ ଯେ, ଲକ୍ଡାଉନ୍ କାରଣରୁ ସଂକ୍ରମଣ ମାମଲା ଅଧିକ ବଢି ପାରିନାହିଁ।
