ପାଟଣା: କେନ୍ଦୁଝର ଜିଲ୍ଲା ପାଟଣା ବ୍ଲକ ଅନ୍ତର୍ଗତ ଡୁମୁରିଆ ପଂଚାୟତ ତଣ୍ଡୋ ଗ୍ରାମରେ ଗତ ୧୪ ତାରିଖ ସତ୍ୟନାରାୟଣ ନାଏକଙ୍କ ପତ୍ନି ଜୟନ୍ତୀ ନାଏକ (୨୨)ଙ୍କୁ ତାଙ୍କ ଶାଶୁ ଗୋଲାପ ନାଏକ, ଶ୍ୱଶୁର ଗୋବିନ୍ଦ ନାଏକ ଓ ନଣନ୍ଦ କୁନି ନାଏକ ହାଣି ମାରି ଦେବାକୁ ଚେଷ୍ଟା କରିଥିବା ବେଳେ ଏମାନଙ୍କ ଆକ୍ରମଣରେ ଜୟନ୍ତୀ ଗୁରୁତର ହୋଇଛନ୍ତି। ତାଙ୍କ ମୁଣ୍ଡକୁ ଏକ ଧାରୁଆ ଅସ୍ତ୍ରରେ ହାଣି ଦିଆଯାଇଥିବାରୁ ତାଙ୍କୁ ଡାକ୍ତରଖାନାରେ ଚିକିତ୍ସା କରାଯାଇଛି। ଜୟନ୍ତୀଙ୍କ ଘର ଠାକୁରମୁଣ୍ଡା ଥାନା ଅନ୍ଧାରୀ ଖମଣ ଗ୍ରାମରେ ଓ ସେ ଦେଢ ବର୍ଷ ତଳେ ତଣ୍ଡୋ ଗ୍ରାମର ସତ୍ୟନାରାୟଣ ନାଏକଙ୍କୁ ବିବାହ କରିଥିଲେ।
ସ୍ୱାମୀ ସତ୍ୟନାରାୟଣ ଯୋଡା ଅଂଚଳରେ ଦିନ ମଜୁରିଆ ଭାବେ କାମ କରୁଥିବା ବେଳେ ଲକଡାଉନ ଯୋଗୁଁ ସେ ଘରକୁ ଫେରି ନାହାନ୍ତି। ଏପରି ସ୍ଥଳେ ଜୟନ୍ତୀଙ୍କୁ ଅଧିକ ଯୌତୁକ ଆଣିବା ପାଇଁ ଦାବି କରି ନିରାଶ ହୋଇଥିବା ତାଙ୍କ ଶାଶୁ ଶ୍ୱଶୁର ଓ ନଣନ୍ଦ ଗତ ୧୪ ତାରିଖ ପ୍ରବଳ ମାଡ ମାରିବା ସହ ତାଙ୍କୁ ମାଡିବସି ଏକ ଧାରୁଆ ଅସ୍ତ୍ରରେ ମୁଣ୍ଡକୁ ହାଣି ଦେଇଥିବା ଜଣାପଡିଛି। ଏ ନେଇ ଜୟନ୍ତୀଙ୍କ ପକ୍ଷରୁ ଘଟଗାଁ ଥାନାରେ ଲିଖିତ ଅଭିଯୋଗ ହୋଇଛି। ପୁଲିସ ଘଟଣାର ତଦନ୍ତ କରୁଥିବା ଜଣାପଡିଛି।
Comments are closed.