୬ ମାସର ଶିଶୁକୁ କଚାଡ଼ି କଚାଡ଼ି ହତ୍ୟା କଲା ମାଆ

ଅଲୀଗଡ଼: ଅଲୀଗଡ଼ର ଜୱାଁ ସ୍ଥିତ ରାମପୁର ଗାଁରେ ଘରୋଇ କଳହକୁ ନେଇ ଉତ୍ତ୍ୟକ୍ତ ମାଆ ନିଜ ଛଅ ମାସର ଶିଶୁକନ୍ୟାକୁ ଚଟାଣରେ କଚାଡ଼ି କଚାଡ଼ି ହତ୍ୟା କରିଥିବା ଅଭିଯୋଗ ହୋଇଛି। ମହିଳାଙ୍କର ନିଜ ସ୍ୱାମୀଙ୍କ ସହ କୌଣସି କାରଣରୁ ଝଗଡ଼ା ହୋଇଥିଲା, ଯାହା ଫଳରେ ରାଗରେ ସେ ଏପରି ପଦକ୍ଷେପ ନେଇଥିବା ଜଣାପଡ଼ିଛି।

ସୂଚନା ଅନୁସାରେ, ଝିଅକୁ ହତ୍ୟା କରିବା ପୂର୍ବରୁ ମାଆ ପିଙ୍କି ସ୍ୱାମୀଙ୍କୁ ଲୁଗାପଟା କିଣିବାକୁ ଟଙ୍କା ମାଗିଥିଲେ। ତେବେ ଦିନେ ଦୁଇ ଦିନ ମଧ୍ୟରେ ଟଙ୍କା ଦେବେ ବୋଲି ତାଙ୍କ ସ୍ୱାମୀ ତାଙ୍କୁ କହିଥିଲେ। ଏହାକୁ ନେଇ ବିବାଦ ଆରମ୍ଭ ହେଲା ଓ ମହିଳାଜଣକ ନିଜ ଝିଅକୁ ମାଡ଼ ମାରିବାକୁ ଲାଗିଲେ। ଏହାପରେ ଯେତେବେଳେ ତାଙ୍କ ସ୍ୱାମୀ ଶିଶୁକୁ ତାଙ୍କଠାରୁ ଛଡ଼ାଇ ଆଣିଲେ, ସେତେବେଳେ ମହିଳା ପୁଣି ଶିଶୁକୁ ଛଡ଼ାଇ ନେଇ ଏକ ଘର ଭିତରକୁ ନେଇ କଚାଡ଼ି ହତ୍ୟା କରିଥିଲେ। ଖବର ମିଳିବା ମାତ୍ରେ ପୁଲିସ ଘଟଣାସ୍ଥଳରେ ପହଞ୍ଚି ମହିଳାଙ୍କୁ ଗିରଫ କରିବା ସହ ତଦନ୍ତ ଜାରି ରଖିଛି।