କଲକାତା: ପଶ୍ଚିମବଙ୍ଗର ଜଣେ ମନ୍ତ୍ରୀ ସିଦ୍ଦୀକୁଲ୍ଲା ଚୌଧୁରୀଙ୍କୁ ଭିଜା ଦେବାକୁ ଅନିଚ୍ଛା ପ୍ରକାଶ କରିଛି ବାଂଲାଦେଶ। ଏଥିପାଇଁ ସିଦ୍ଦୀକୁଲ୍ଲା ଭାରତ ସରକାରଙ୍କ ନାଗରିକତା ସଂଶୋଧନ ଆଇନ(ସିଏଏ)କୁ ଦାୟୀ କରିଛନ୍ତି। ସିଦ୍ଦୀକୁଲ୍ଲା କହିଛନ୍ତି, ଯେ, ସେ ତାଙ୍କ ବ୍ୟକ୍ତିଗତ କାର୍ଯ୍ୟରେ ୬ ଦିନିଆ ବାଂଲାଦେଶ ଗସ୍ତ କରିବାର ଥିଲା। ଏଥିପାଇଁ ସେ ଗତ ୨୩ ତାରିଖରେ ଭିଜା ଲାଗି ଆବେଦନ କରିଥିଲେ। ବିଦେଶ ମନ୍ତ୍ରଣାଳୟ ଏବଂ ପଶ୍ଚିମବଙ୍ଗ ସରକାରଙ୍କ ପକ୍ଷରୁ ତାଙ୍କୁ ଅନୁମତି ମଧ୍ୟ ମିଳିଥିଲା। କିନ୍ତୁ ଶେରେ ବାଂଲାଦେଶ ସରକାର ଭିଜା ଦେଲେନାହିଁ।
ସିଦ୍ଦୀକୁଲ୍ଲା ହେଉଛନ୍ତି ଜମୀୟତ-ଏ-ଉଲେମା ହିନ୍ଦର ପଶ୍ଚିମବଙ୍ଗ ଅଧ୍ୟକ୍ଷ। ସେ କହିଛନ୍ତି, ବାଂଲାଦେଶର ଜଣେ ବରିଷ୍ଠ ଡେପୁଟି ହାଇକମିଶନ ଅଧିକାରୀ ଭିଜା ରଦ୍ଦ କରିବା କଥାକୁ ସ୍ବୀକାର କଲେନାହିଁ କି ମନା ବି କଲେ ନାହିଁ। ସେ କେବଳ ଏତିକି କିହଲେ ଯେ, ଢାକାରୁ ଜରୁରୀ କ୍ଲିୟରାନ୍ସ ଏ ପର୍ଯ୍ୟନ୍ତ କଲକାତାସ୍ଥିତ ଆମ କାର୍ଯ୍ୟାଳୟକୁ ମିଳିନାହିଁ। ଏଥିରୁ ସ୍ପଷ୍ଟ ଜଣାପଡ଼ୁଛି ଯେ ବାଂଲାଦେଶ ସରକାର ସିଏଏକୁ ନେଇ ଏଭଳି ଆଭିମୁଖ୍ୟ ଗ୍ରହଣ କରିଛନ୍ତି ବୋଲି ସିଦ୍ଦୀକୁଲ୍ଲା କହିଛନ୍ତି। ସୂଚନାଯୋଗ୍ୟ, ତୃଣମୂଳ ସ୍ତରରେ ନାଗରିକତା ଆଇନ ବିରୋଧରେ ସ୍ବର ଉତ୍ତୋଳନକାରୀଙ୍କ ମଧ୍ୟରେ ସିଦ୍ଦୀକୁଲ୍ଲା ହେଉଛନ୍ତି ଅନ୍ୟତମ ବ୍ୟକ୍ତି। ବାଂଲାଦେଶ ସିଏଏ ପ୍ରସଙ୍ଗରେ ନିରପେକ୍ଷତା ଅବଲମ୍ବନ କରିବାକୁ ଚାହୁଁଛି। ଏଥିପାଇଁ ବାଂଲା ସରକାର ମନ୍ତ୍ରୀଙ୍କୁ ଭିଜା ଦେଇନାହିଁ।
