ନୂଆଦିଲ୍ଲୀ : ଦିଲ୍ଲୀର ଏକ ସ୍ବତନ୍ତ୍ର ଅଦାଲତ ଶୁକ୍ରବାର କଂଗ୍ରେସ ସାଧାରଣ ସମ୍ପାଦକ ପ୍ରିୟଙ୍କା ଗାନ୍ଧୀ ଭଦ୍ରାଙ୍କ ସ୍ବାମୀ ରବର୍ଟ ଭଦ୍ରାଙ୍କୁ ବିଦେଶ ଗସ୍ତ ପାଇଁ ଅନୁମତି ପ୍ରଦାନ କରିଛନ୍ତି । ସ୍ୱତନ୍ତ୍ର ବିଚାରପତି ଅରବିନ୍ଦ କୁମାର ରବର୍ଟ ଭଦ୍ରାଙ୍କୁ ସେପ୍ଟେମ୍ବର ୨୧ରୁ ଅକ୍ଟୋବର ୮ ମଧ୍ୟରେ ସ୍ପେନ ଗସ୍ତ କରିବାକୁ ଅନୁମତି ଦେଇଛନ୍ତି । ତେବେ ଗସ୍ତ କାର୍ଯ୍ୟସୂଚୀ ବିଷୟରେ କୋର୍ଟକୁ ଜଣାଇବାକୁ ରବର୍ଟ ଭଦ୍ରାଙ୍କୁ କୁହାଯାଇଛି ।
ସୂଚନା ଅନୁସାରେ ବ୍ୟବସାୟ ନିମନ୍ତେ ବିଦେଶ ଗସ୍ତ ପାଇଁ ରର୍ବଟ ଅନୁମତି ମାଗିଥିଲେ । ବେଆଇନ ଅର୍ଥ କାରବାର ନେଇ ତାଙ୍କ ବିରୋଧରେ ଥିବା ମାମଲାର ତଦନ୍ତ ଜାରି ରହିଛି । ଏହି ମାମଲାରେ ସେ ଅଗ୍ରୀମ ଜାମିନ ପାଇଛନ୍ତି । ତେଣୁ ତାଙ୍କୁ ଅନୁମତି ନଦେବାକୁ ପ୍ରବର୍ତ୍ତନ ନିର୍ଦେଶାଳୟ (ଇଡି) ଅଦାଲତରେ ଯୁକ୍ତି ଉପସ୍ଥାପନ କରିଥିଲା । ମାତ୍ର ଅଦାଲତ ସମସ୍ତ ପକ୍ଷ ଶୁଣିବା ପରେ ତାଙ୍କୁ ବିଦେଶ ଗସ୍ତ ପାଇଁ ଅନୁମତି ଦେଇଛନ୍ତି । ଲଣ୍ଡନରେ ୧୯ ଲକ୍ଷ ପାଉଣ୍ଡ ମୂଲ୍ୟର ଏକ ସମ୍ପତ୍ତି କିଣା ମାମଲାରେ ସେ ଅଭିଯୁକ୍ତ ଅଛନ୍ତି ଓ ସେନେଇ ମାମଲା ଚାଲିଛି ।
