ଧାମନଗର : ମୁସଲମାନ ଜାତିର ପବିତ୍ର ମା’ ହଜରତ ବିବି ଆୟେଶାଙ୍କର ନାମରେ ବିକୃତ ଚଳଚ୍ଚିତ୍ର ନିର୍ମାଣ କରାଯାଇଥିବା ପ୍ରତିବାଦରେ ଶୁକ୍ରବାର ଧାମନଗର ମୁସଲିମ୍ ସମ୍ପ୍ରଦାୟ ପକ୍ଷରୁ ନିରବ ଶୋଭାଯାତ୍ରା କରାଯାଇଛି । ଉକ୍ତ ଚଳଚ୍ଚିତ୍ର ‘ଆୟେଶା’କୁ ନିଷେଧ କରିବା ସହ ନିର୍ମାତା ୱସିମ ରିଜୱିକୁ ଫାଶି ଦେବାକୁ ଦାବି କରାଯାଇ ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ସ୍ମାରକପତ୍ର ଦିଆଯାଇଛି। ମୁକ୍ତିଲାଭ ହେବାକୁ ଥିବା ସେହି ବିବାଦୀୟ ଚଳଚ୍ଚିତ୍ର ପବିତ୍ର ଇସଲାମ୍ ଧର୍ମକୁ ଆକ୍ଷେପ କରୁଥିବାରୁ ଏହାକୁ ପ୍ରତିବାଦ କରି ଆଜି ସକାଳେ ଧାମନଗର ହଜାର ହଜାର ମୁସଲମାନ ଧାମନଗର ଖାନକା ପରିସରରେ ଏକତ୍ରିତ ହୋଇଥିଲେ । ପରେ ସେମାନେ ହାତରେ ପ୍ଲା କାଡ୍ ଏବଂ ବ୍ୟାନର ଧାରି ନିରବ ଶୋଭଯାତ୍ରାରେ ବଜାର ପରିକ୍ରମା କରି ଧାମନଗର ତହସିଲ କାର୍ଯ୍ୟାଳୟକୁ ଯାଇଥିଲେ । ଶେଷରେ ଶୋଭାଯାତ୍ରାକାରୀଙ୍କ ପ୍ରତିନିଧି ଦଳ ଧାମନଗର ତହସିଲଦାରଙ୍କୁ ଭେଟି ଚଳଚ୍ଚିତ୍ରକୁ ନିଷେଧ କରିବା ସହ ୱସିମ ରିଜୱିକୁ ଫାଶି ଦେବା ନିମନ୍ତେ ଦାବି ପତ୍ର ପ୍ରଦାନ କରିଥିଲେ ।
