ଭଲ ରାସ୍ତା ଯୋଗୁ ଦୁର୍ଘଟଣା ବଢୁଛି: କର୍ଣ୍ଣାଟକ ଉପ ମୁଖ୍ୟମନ୍ତ୍ରୀ

ବେଙ୍ଗାଲୁରୁ: କେନ୍ଦ୍ର ସରକାରଙ୍କ ଦ୍ବାରା ଲାଗୁ କରାଯାଇଥିବା ନୂଆ ମୋଟର ଯାନ ଆଇନକୁ ନେଇ କର୍ଣ୍ଣାଟକ ଉପ ମୁଖ୍ୟମନ୍ତ୍ରୀ ଗୋବିନ୍ଦ କରଜୋଲ ଅଜବ ମନ୍ତବ୍ୟ ଦେଇଛନ୍ତି। ଦେଶରେ ବଢୁଥିବା ଦୁର୍ଘଟଣା ପାଇଁ ସେ ଉନ୍ନତ ମାନର ସଡ଼କକୁ ଦାୟୀ କରିଛନ୍ତି। ଗୋବିନ୍ଦ କହିଛନ୍ତି, ଭଲ ରାସ୍ତା ହେବା କାରଣରୁ ବଡ଼ ବଡ଼ ଦୁର୍ଘଟଣା ଘଟୁଛି। ଗାଡ଼ି ଚାଳକ ଘଣ୍ଟା ପ୍ରତି ୧୨୦ରୁ ୧୬୦ କିଲୋମିଟର ବେଗରେ ଗାଡ଼ି ଚଲାଉଛନ୍ତି, ଯେଉଁଥିପାଇଁ ଦୁର୍ଘଟଣା ଘଟୁଛି। ଅଧିକାଂଶ ଦୁର୍ଘଟଣା ଜାତୀୟ ରାଜପଥରେ ଘଟୁଛି। ତେଣୁ ମୋଟର ଯାନ ଆଇନରେ ଅଧିକ ପରିମାଣର ଜରିମାନା ଲାଗୁ କରାଯିବାକୁ ମୁଁ ସମର୍ଥନ କରୁ ନାହିଁ। ଆମେ କ୍ୟାବିନେଟ ମିଟିଂରେ ଜରିମାନାରେ ସଂଶୋଧନ କରିବା ଉପରେ ନିଷ୍ପତ୍ତି ନେବୁ ବୋଲି ସେ କହିଛନ୍ତି। ମୁଖ୍ୟମନ୍ତ୍ରୀ ବି.ଏସ. ୟେଦୁରପ୍ପା ଗୁଜରାଟ ଭଳି କର୍ଣ୍ଣାଟକରେ ବି ଜରିମାନା ବାବଦ ଅର୍ଥରାଶି ହ୍ରାସ କରିବା ଲାଗି ନିର୍ଦେଶ ଦେଇଛନ୍ତି।