ଇସଲାମାବାଦ : ଜାମ୍ମୁ କାଶ୍ମୀରରୁ ଧାରା ୩୭୦ ଉଚ୍ଛେଦକୁ ନେଇ ପାକିସ୍ତାନ ବିଚଳିତ ହୋଇପଡିଛି। ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ, ରେଳ ମନ୍ତ୍ରୀ ଶେଖ ରାଶିଦ ଅହମଦ, ସୂଚନା ଏବଂ ପ୍ରସାରଣ ମନ୍ତ୍ରୀ ଫୱାଦ ଚୌଧୁରୀଙ୍କ ପରେ ଶୁକ୍ରବାର ପାକିସ୍ତାନ ସେନା ମୁଖ୍ୟ ଜେନେରାଲ କମର ଜାଭେଦ ବାଜୱା ଭାରତକୁ ଯୁଦ୍ଧ ଧମକ ଦେଇଛନ୍ତି।
ବାଜୱା କହିଛନ୍ତି ଯେ କାଶ୍ମୀର ଲୋକଙ୍କ ଉପରେ ଅତ୍ୟାଚାର କରାଯାଉଛି। କାଶ୍ମୀର ଏବେ ନରେନ୍ଦ୍ର ମୋଦୀଙ୍କ ହିନ୍ଦୁତ୍ୱର ଶିକାର ହୋଇଛି। କାଶ୍ମୀର ଉପରେ ଭାରତ ସରକାରଙ୍କ ପଦକ୍ଷେପ ଆମ ପାଇଁ ଏକ ଆହ୍ୱାନ ହୋଇଛି। ପାକିସ୍ତାନ କାଶ୍ମୀର ଲୋକଙ୍କ ସହ ଅଛି ଓ ତାଙ୍କୁ ଧୋକା ଦେବନାହିଁ। ଆମେ ଏଥିପାଇଁ କୌଣସି ବି ସ୍ତରକୁ ଯାଇପାରିବୁ ଓ କିଛି ବି କରିପାରିବୁ। ପାକିସ୍ତାନ ସେନା ଶେଷ ନିଶ୍ୱାସ ଏବଂ ଶେଷ ଗୁଳି ପର୍ଯ୍ୟନ୍ତ ଲଢିବ। ଏବେ ଯୁଦ୍ଧର ପରସ୍ଥିତି ସୃଷ୍ଟି ହୋଇଛି। ଆମେ କାଶ୍ମୀର ପାଇଁ ବଳିଦାନ ଦେବାକୁ ପ୍ରସ୍ତୁତ ଅଛୁ।
ସେପଟେ ପାକିସ୍ତାନ ଏଲଓସି ନିକଟସ୍ଥ ପାକିସ୍ତାନ ଅଧିକୃତ କାଶ୍ମୀର (ପିଓକେ)ର ବାଘ ଏବଂ କୋଟଲି ସେକ୍ଟରରେ ୨୦୦୦ରୁ ଅଧିକ ସୈନ୍ୟ ମୁତୟନ କରିଛି। ପାକିସ୍ତାନ ସୈନ୍ୟଙ୍କୁ ଏଲଓସିର ୩୦ କିଲୋମିଟର ଭିତରେ ମୁତୟନ କରାଯାଇଛି। ଏହାସହ ପାକିସ୍ତାନ ଗିଲଗିଟ ବାଲ୍ଟିସ୍ତାନସ୍ଥିତ ସ୍କର୍ଦୁ ବିମାନ ଘାଟିରେ ଜେଏଫ-୧୭ ଯୁଦ୍ଧ ବିମାନ ମୁତୟନ କରିଛି। ପାକିସ୍ତାନ ବାୟୁସେନାର ୩ଟି ସି-୧୩୦ ହରକ୍ୟୁଲସ ପରିବହନ ବିମାନ ସୈନ୍ୟଙ୍କୁ ନେଇ ଗିଲଗିଟ ବାଲ୍ଟିସ୍ତାନରେ ପହଞ୍ଚାଇଛି। ପାକିସ୍ତାନ ସେନା ସୀମାରେ ଅସ୍ତ୍ରଶସ୍ତ୍ର ଠୁଳ କରୁଛି। ଏସବୁରୁ ପାକିସ୍ତାନ ଯୁଦ୍ଧ ପାଇଁ ପ୍ରସ୍ତୁତି ଚଳାଇଥିବା ଜଣାପଡୁଛି। ଭାରତର ଗୁଇନ୍ଦା ସଂସ୍ଥାଗୁଡ଼ିକ ପାକିସ୍ତାନ ସେନାର ପ୍ରତି ସେକେଣ୍ଡର ଗତିବିଧି ଉପରେ କଡ଼ା ନଜର ରଖିଛନ୍ତି। ଭାରତୀୟ ସେନା ସମସ୍ତ ପ୍ରକାର ପରିସ୍ଥିତିକୁ ସାମ୍ନା କରିବା ପାଇଁ ପ୍ରସ୍ତୁତ ରହିଛି ବୋଲି ସେନା ପକ୍ଷରୁ କୁହାଯାଇଛି।
