ସମାଜ ଡିଜିଟାଲ ଡେସ୍କ: କୁଏତରେ ଏକ କୋଠାରେ ବୁଧବାର ଅଗ୍ନିକାଣ୍ଡ ଘଟି ୪୨ ଭାରତୀୟଙ୍କ ସମେତ ୪୯ ଜଣଙ୍କ ମୃତ୍ୟୁ ଘଟିଛି। ଦକ୍ଷିଣ ଅହମଦୀ ପ୍ରଦେଶ ଅନ୍ତର୍ଗତ ମନଗଫ ଅଞ୍ଚଳରେ ଏହି ଅଘଟଣ ଘଟିଛି। ମୃତ ଭାରତୀୟଙ୍କ ମଧ୍ୟରେ ଅଧିକାଂଶ ହେଉଛନ୍ତି କେରଳ ଏବଂ ତାମିଲନାଡୁ ରାଜ୍ୟର।
କେରଳ, ତାମିଲନାଡୁ ସମେତ ଉତ୍ତର ଭାରତୀୟ ରାଜ୍ୟର ଅନେକ ଲୋକ ଏଠାରେ ଏକ କମ୍ପାନୀରେ କାମ କରୁଥିଲେ। କମ୍ପାନୀ ପକ୍ଷରୁ ସେମାନଙ୍କୁ ଏକ ୬ ମହଲା ବିଶିଷ୍ଟ କୋଠାରେ ରହିବା ସୁବିଧା ଦିଆଯାଇଥିଲା। ବୁଧବାର ରାତିରେ କୌଣସି କାରଣରୁ ରୋଷେଇ ଘରେ ନିଆଁ ଲାଗିଯାଇଥିଲା। ରାତି ଯୋଗୁ ଅଗ୍ନିକାଣ୍ଡ ସମ୍ପର୍କରେ ଜଣାପଡ଼ି ନ ଥିଲା। ଫଳରେ ଧୀରେ ଧୀରେ ନିଆଁ କୋଠାର ଅନ୍ୟ ଅଂଶକୁ ବ୍ୟାପିଯିବା ସହିତ ଧୂଆଁ ମୟ ହୋଇଯାଇଥିଲା। ରାତିରେ ଲୋକମାନେ ଶୋଇଥିବାରୁ ଅଗ୍ନିକାଣ୍ଡ ସମ୍ପର୍କରେ ଜାଣି ପାରି ନ ଥିଲେ। ଫଳରେ ଧୂଆଁରେ ଶ୍ୱାସରୁଦ୍ଧ ହୋଇ ପ୍ରାଣ ହରାଇଥିବା କୁହାଯାଉଛି। ଖବର ପାଇ ଦମକଳ ବାହିନୀ ପହଞ୍ଚି ନିଆଁକୁ ଆୟ କରିବାକୁ ଉଦ୍ୟମ କରିଥିଲେ। ଘଟଣାରେ ୪୯ ଜଣଙ୍କ ମୃତ୍ୟୁ ଘଟିଥିବା ନେଇ କୁଏତ ସରକାରଙ୍କ ପକ୍ଷରୁ ସ୍ପଷ୍ଟ କରାଯାଇଛି।
ମୃତକଙ୍କ ମଧ୍ୟରେ ୧୧ଜଣ କେରଳର ବାସିନ୍ଦା ବୋଲି ଜଣାପଡ଼ିଛି। ଏହାବ୍ୟତୀତ ପାକିସ୍ତାନ, ଫିଲିପାଇନ୍ସ, ଇଜିପ୍ଟ ଏବଂ ନେପାଳର ଜଣେ ଲେଖାଏ ମୃତକ ରହିଛନ୍ତି। ଅନେକଙ୍କ ମୃତଦେହ ଚିହ୍ନଟ ହୋଇପାରି ନାହିଁ।
Comments are closed.