୩୩୦ଲିଟର ମଦ ସହ କାର ଜବତ, ଜଣେ ଗିରଫ

ଆଠଗଡ, ୨୪।୧୦:କଟକ ଜିଲ୍ଲା ଅବକାରୀ ଅଧିକ୍ଷକ କରୁଣା ଶଙ୍କର ତିୱାରୀଙ୍କ ନିର୍ଦେଶ କ୍ରମେ ଆଠଗଡ ଅବକାରୀ ଉପଅଧିକ୍ଷକ ସିଏଚ ତିରୁପତିଙ୍କ ନେତୃତ୍ବରେ ଚୋରା ମଦ କାରବାର ରୋକିବାକୁ ନିୟମିତ ପେଟ୍ରୋଲିଂ ଚାଲିଛି । ଗୁରୁବାର ରାତିରେ ଅବକାରୀ କାର୍ଯ୍ୟାଳୟର ଅନତି ଦୂରରେ ଟିପିସିଓଡିଏଲ ବିଦ୍ୟୁତ ସବଷ୍ଟେସନ ରାସ୍ତାରେ ସନ୍ଦିଗ୍ଧ ଅବସ୍ଥାରେ ଯାଉଥିବା ଏକ କାରକୁ ଅବକାରୀ ସ୍କ୍ୱାର୍ଡ ଅଟକାଇଥିଲେ । ହ୍ୟୁଣ୍ଡାଇ ଆଇ୧୦ ଓଆର ୦୫ ଏସି ୯୩୯୪ ନଂ ବିଶିଷ୍ଟ ଉକ୍ତ କାର ମଧ୍ଯରୁ ଚାଲାଣ ହେଉଥିବା ୩୩୦ ଲିଟର ଦେଶୀ ମଦ ସହିତ ସଂପୃକ୍ତ କାରଟିକୁ ଜବତ କରାଯାଇଥିଲା । ଏଥିରେ ସଂପୃକ୍ତ ଥିବା ମାଣିଆବନ୍ଧ ଥାନା ଅନ୍ତର୍ଗତ ଭଗବତପୁର ଗ୍ରାମର ପ୍ରକାଶ ବେହେରାଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିବା ଜଣାପଡିଛି । ଏହି ଚଢାଉରେ ଅବକାରୀ ଉପଅଧିକ୍ଷକ ଶ୍ରୀ ତିରୁପତିଙ୍କ ସମେତ ନିରୀକ୍ଷକ ରବି ନାରାୟଣ ପଧାନ ଓ ଉପନିରୀକ୍ଷକ ଅରୁଣ କୁମାର ଭୋଇ ଏବଂ ଅନ୍ଯ କର୍ମଚାରୀ ସାମିଲ ଥିଲେ।