ଲାଞ୍ଜିଗଡ଼: ଲାଞ୍ଜିଗଡ଼଼ ବ୍ଲକ ବିଶ୍ୱନାଥପୁର ନିକଟସ୍ଥ କୁଟୁରୁପାଲି ଗାଁର ତିଳୋତ୍ତମା ଚାଲାଣଙ୍କ ଆବାସ ଯୋଜନା ଗୃହର ଛାତ ପକାଇବା କାମରେ ନିୟୋଜିତ ୧୭ବର୍ଷିୟ ନାବାଳିକା ପ୍ରଭା କୋଶଲିଆଙ୍କ ବିଦ୍ୟୁତ ଆଘାତରେ ମୃତ୍ୟୁ ଘଟିଥିବା ବେଳେ ଏବେ ତାଙ୍କ ପରିବାରକୁ ୩ ଲକ୍ଷ ଟଙ୍କ କ୍ଷତିପୂରଣ ପ୍ରଦାନ କରାଯାଇଛି।
ଛାତ ଉପରେ ଯାଇଥିବା ୧୧କେଭି ବିଦ୍ୟୁତ ତାର ସଂସ୍ପର୍ଶରେ ଆସି ବାଲିଯୋଡି ଗ୍ରାମର ନାବାଳିକା ପ୍ରଭା କୋଶଲିଆଙ୍କ ୨୦୨୦ ମସିହା ମାର୍ଚ୍ଚ ୬ ତାରିଖରେ ମୃତ୍ୟୁ ହୋଇଥିଲା। ଠିକାଦାର ଜଗଦୀଶ ଚାଲାଣ ଏହି ଘର କାମରେ ନାବାଳିକା ପ୍ରଭା କୋଶଲିଆଙ୍କୁ କାମରେ ଲଗାଇଥିଲେ। ଘର କାମର ଛାତ ପକାଇବା ବେଳେ ମିସ୍ତ୍ରୀଙ୍କ ପାଖରେ ସିମେଣ୍ଟ ଯୋଗାଉ ଥିବା ବେଳେ ଅଳ୍ପ ଉଚତାରେ ଯାଇଥିବା ୧୧କେଭି ବିଦ୍ୟୁତ ତାର ସଂସ୍ପର୍ଶରେ ଆସି ପ୍ରଭା କୋଶଲିଆଙ୍କ ମୃତ୍ୟୁ ଘଟିଥିଲା। ବିଦ୍ୟୁତ ତାର ଜନବସତି ଅଞ୍ଚଳରେ ଟଣା ଗଲାବେଳେ ସ୍ୱତନ୍ତ୍ର ଭାବରେ ଧ୍ୟାନ ଦେଇ କେବୁଲ ତାର ଲଗାଇବା ନିୟମ ରହିଛି। ବିଦ୍ୟୁତ ତାର ତଳେ କୌଣସି ନିର୍ମାଣ ହେଲେ ବିଦ୍ୟୁତ ବିଭାଗ ଏହାକୁ ବନ୍ଧ କରିପାରିବା ନିୟମ ଥିଲେ ମଧ୍ୟ ଏହି ଘଟଣାରେ ବିଦ୍ୟୁତ ବିଭାଗର ଅବହେଳା ରହିଥିବା ଏବଂ ସେହି କାରଣରୁ ଏକ ନିରୀହ ଜିବନ ଚାଲିଗଲା ବୋଲି ଦର୍ଶାଇ ଜାତୀୟ ମାନବାଧିକାର କମିଶନଙ୍କ ନିକଟରେ ଅଭିଯୋଗ ଦାଖଲ କରିଥିଲେ ମାନବଧିକାର କର୍ମୀ ଦିଲ୍ଲିପ କୁମାର ଦାସ। କମିଶନ ଏହି ମାମଲାକୁ କେସ ନଂ ୧୯୬୯/୧୮/୬/୨୦୨୦ ଭାବରେ ଗ୍ରହଣ କରି ବିଚାର କରିବା ସହିତ ସବୁ ପକ୍ଷରୁ ରିପୋର୍ଟ ତଲବ କରିଥିଲେ। ସରକାରଙ୍କ ବିଦ୍ୟୁତ ବିଭାଗ ଓ ପୁଲିସ ରିପୋର୍ଟ ପାଇ ତର୍ଜମା କଲା ପରେ ୧୯ ଜାନୁୟାରୀ ୨୦୨୨ରେ ମୁଖ୍ୟ ଶାସନ ସଚିବ ଓଡ଼ିଶାଙ୍କୁ ନୋଟିସ ଜାରିକରି ୩ଲକ୍ଷ ଟଙ୍କା କ୍ଷତିପୂରଣ ଦେବା ଲାଗି ନିର୍ଦ୍ଦେଶ ଦେଇଥିଲେ। ଏହି ନିର୍ଦ୍ଦେଶନାମାକୁ ପାଳନ କରି ବିଦ୍ୟୁତ ବିଭାଗ ତରଫରୁ ୨୬ ଏପ୍ରିଲ ୨୦୨୨ରେ ଚେକ୍ ନଂ ୦୨୧୪୮୪ ପ୍ରଭା କୋଶଲିଆଙ୍କ ପିତାଙ୍କୁ ପ୍ରଦାନ କରିଥିବା କମିଶନରଙ୍କୁ ରିପୋର୍ଟ ପ୍ରଦାନ କରାଯାଇଛି। ଏହି ରିପୋର୍ଟକୁ ଆଧାର କରି କମିଶନ ଗତ ୩୦ମଇ ୨୦୨୨ରେ ଚୁଡାନ୍ତ ରାୟ ପ୍ରକାଶ କରି ମାନବାଧିକାର ସୁରକ୍ଷା ଆଇନ ଅନୁସାରେ କ୍ଷତିପୂରଣ ମିଳିଥିବାରୁ ମାମଲାକୁ ଶେଷ କରିଛନ୍ତି।
ସୂଚନାଯୋଗ୍ୟ, ଗତ ୯ମାର୍ଚ୍ଚ ୨୦୨୦ରେ ଏନେଇ “ସମାଜ”ରେ ବିସ୍ତୃତ ଖବର ପ୍ରକାଶ ପାଇଥିଲା।
