ଭୁବନେଶ୍ୱର: ଚଳିତ ବର୍ଷର +୨ ପରୀକ୍ଷା ଫଳ କେବେ ବାହାରିବା ସେ ନେଇ ଉଚ୍ଚ ମାଧ୍ୟମିକ ଶିକ୍ଷା ପରିଷଦ ସନ୍ଦିହାନ ଥିବା ବେଳେ ଗଣ ମାଧ୍ୟମରେ ପ୍ରକାଶିତ ସମ୍ବାଦ ‘ମୋବାଇଲ ଟର୍ଚ୍ଚରେ ଖାତାଦେଖା’କୁ ପ୍ରସଙ୍ଗ କରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ କହିଛି +୨ ପରିଷଦ। ପରୀକ୍ଷା ଫଳ ପ୍ରକାଶନ, ମୂଲ୍ୟାୟନ କେନ୍ଦ୍ରରେ ବ୍ୟବସ୍ଥା ଏବଂ ଅନ୍ୟାନ୍ୟ ଅସୁବିଧା ପ୍ରତି ଦୃଷ୍ଟି ନ ଦେଇ +୨ ପରିଷଦ କେବଳ କାର୍ଯ୍ୟାନୁଷ୍ଠାନ ଗ୍ରହଣ ପ୍ରସଙ୍ଗକୁ ଅନେକ ଅଧ୍ୟାପକ ଅଧ୍ୟାପିକା ନାପସନ୍ଦ କରିଛନ୍ତି।
ରାଜ୍ୟର ୫୮ଟି ମୂଲ୍ୟାୟନ କେନ୍ଦ୍ରରେ ଖାତା ଦେଖା ଚାଲିଥିବା ବେଳେ ୩୬ଟି କେନ୍ଦ୍ରରେ ଅନଲାଇନ ମାଧ୍ୟମରେ ଖାତା ଦେଖା ଚାଲିଛି। ଏପ୍ରିଲ ୮ରୁ ପ୍ରଥମ ପର୍ଯ୍ୟାୟ ଅନଲାଇନ ଖାତା ଦେଖାରେ ବହୁ ତ୍ରୁଟି ଦେଖାଦେବାରୁ ପ୍ରାୟ ୫ଦିନ ବିଳମ୍ବରେ ଖାତା ଦେଖା ଆରମ୍ଭ ହୋଇଥିଲା ବେଳେ ଏପ୍ରିଲ ୨୩ରୁ ଦ୍ଵିତୀୟ ପର୍ଯ୍ୟାୟ ଆରମ୍ଭ ହେବା ପରେ ବାତ୍ୟା ଫନୀ ପାଇଁ ଖାତା ଦେଖା ବନ୍ଦ ରହିଥିଲା।
ଖବର ନେବାରେ ଜଣାପଡିଛି ଯେ ରାଜ୍ୟର ଅଧାରୁ ଅଧିକ ମୂଲ୍ୟାୟନ କେନ୍ଦ୍ରରେ ଏସି ବ୍ୟବସ୍ଥା ନାହିଁ ଓ ଯେଉଁଠାରେ ଏସି ଅଛି ସେଠାରେ ଏସି ପାଇଁ ଇଲେକ୍ଟ୍ରି ବିଲ ଭରଣା କରିବା ପାଇଁ ଅର୍ଥ ନାହିଁ। ଅନ୍ୟ ପକ୍ଷରେ ଶୀଘ୍ର ଖାତା ଦେଖିବା ପାଇଁ ପରିଷଦ ତାଗିଦ କରିଥିବା ବେଳେ ଅଧ୍ୟାପକ ଅଧ୍ୟାପିକାମାନେ ଅସହ୍ୟ ଗୁଳୁଗୁଳିରେ ଖାତା ଦେଖିବାକୁ ବାଧ୍ୟ ହେଉଛନ୍ତି। କେତେକ କେନ୍ଦ୍ରରେ ପ୍ରଥମ ପର୍ଯ୍ୟାୟ ଖାତା ଦେଖା ଏ ଯାଏଁ ଶେଷ ହୋଇ ନ ଥିବା ବେଳେ ବହୁ ଅଧ୍ୟାପକ ଅଧ୍ୟାପିକାଙ୍କୁ ଦୁଇ ଦୁଇଟି ମୂଲ୍ୟାୟନ କେନ୍ଦ୍ରରେ ନିୟୋଜିତ କରାଯାଇଛି। ଏଭଳି ସମସ୍ୟା ପ୍ରତିବର୍ଷ ଘଟୁଥିଲେ ମଧ୍ୟ ପରିଷଦ ପକ୍ଷରୁ କୌଣସି ପଦକ୍ଷେପ ନିଆଯାଉ ନାହିଁ।
