ଜାମ୍ମୁ: ପୁଲୱାମାରେ ଆକ୍ରମଣ ପରେ ସୁରକ୍ଷା ବ୍ୟବସ୍ଥାକୁ ବୃଦ୍ଧି କରିବା ଏବଂ ସୁପ୍ରିମକୋର୍ଟରେ ଧାରା ୩୫-କ ଉପରେ ଶୁଣାଣି ସମୟରେ କୌଣସି ହିଂସାକୁ ପ୍ରତିହତ କରିବା ଲାଗି କେନ୍ଦ୍ର ସରକାର ଶନିବାର ୧୦୦ କମ୍ପାନୀ ଅର୍ଦ୍ଧ ସାମରିକ ସୁରକ୍ଷାବଳଙ୍କୁ ପଠାଇଛନ୍ତି। ସେମାନଙ୍କ ମଧ୍ୟରେ ୪୫ କମ୍ପାନୀ ସିଆରପିଏଫ ଯବାନ ରହିଥିବାବେଳେ ୩୫ କମ୍ପାନୀ ବିଏସଏଫ ଏବଂ ୧୦ କମ୍ପାନୀ ଲେଖାଏ ଏସଏସବି ଓ ଆଇଟିବିପି ଯବାନଙ୍କୁ ପଠାଯାଇଛି। ସୁରକ୍ଷା ଦୃଷ୍ଟିକୋଣରୁ ସମସ୍ତ ଯବାନଙ୍କୁ ବିମାନ ଯୋଗେ ସ୍ଥାନାନ୍ତର କରାଯାଇଛି।
ଅନ୍ୟପଟେ ସୁପ୍ରିମକୋର୍ଟରେ ଶନିବାର ସମ୍ବିଧାନର ଧାରା ୩୫-କ ଉପରେ ଶୁଣାଣି ହେବ। ଏହି ଧରା ଅନୁଯାୟୀ ଜାମ୍ମୁ-କାଶ୍ମୀରରେ ଅନ୍ୟ ରାଜ୍ୟର କୌଣସି ନାଗରିକ ଭୂସମ୍ପତ୍ତି କ୍ରୟ କରିପାରିବେ ନାହିଁ। ତେଣୁ ଶୁଣାଣି ସମୟରେ କୌଣସି ହିଂସାକାଣ୍ଡ ଘଟିବା ଆଶଙ୍କାରେ ଯବାନମାନଙ୍କୁ ମୁତୟନ କରାଯାଉଥିବା କୁହାଯାଉଛି। ଏହା ପୂର୍ବରୁ ପୁଲିସ ଶୁକ୍ରବାର ବିଳମ୍ବିତ ରାତିରେ ବିଚ୍ଛିନ୍ନତାବାଦୀ ନେତା ତଥା ଜାମ୍ମୁ-କାଶ୍ମୀର ଲିବରେଶନ ଫ୍ରଣ୍ଟ ମୁଖ୍ୟ ୟାସିନ ମଲିକଙ୍କୁ ଗିରଫ କରିଛି। ଏଥିସହ ଉତ୍ତର, ଦକ୍ଷିଣ ଏବଂ କେନ୍ଦ୍ରୀୟ କାଶ୍ମୀରରୁ ପୁଲିସ ଜମ୍ମାତ-ଏ-ଇସଲାମି ସହ ଜଡ଼ିତ ୧୨ରୁ ଅଧିକ ନେତାଙ୍କୁ ଗିରଫ କରିଛି।
