କଲକାତା: ହୁଗୁଳି ନଦୀର ମହିଷାଦଳର ‘ହରିବଲ୍ଲଭପୁର’ ଓ ‘ବାଦୁର’ ମଧ୍ୟାଞ୍ଚଳରେ ଏକ ବାଂଲାଦେଶୀ ଜାହାଜ ବୁଡ଼ିଯିବାଦ୍ୱାରା ଘଟଣାକୁ ନେଇ ଆଜି ଚାଞ୍ଚଲ୍ୟ ଖେଳିଯାଇଛି। ସୁତାହାଟ ଥାନା ପୁଲିସ ସୂତ୍ରରୁ ଜଣାପଡ଼ିଛି ଯେ ବଜବଜରୁ ଜାହାଜଟି ସାମଗ୍ରୀ ନେଇ ବାଂଲାଦେଶ ଯାଉଥିଲା। ଜାହାଜଟିର ନାମ ‘ଏମ୍ବି ସୋମ-୩’। ଜାହାଜରେ ୧୦ଜଣ ଭଳି ନାବିକ ଥିଲେ। ସୁତାହାଟ ଥାନା ପୁଲିସର ତତ୍ପରତାରେ ଏବଂ ସ୍ଥାନୀୟ ମତ୍ସ୍ୟଜୀବୀଙ୍କ ସହାୟତାରେ ଜାହାଜ ମଧ୍ୟରେ ଥିବା ୧୦ଜଣ ନାବିକଙ୍କୁ ଉଦ୍ଧାର କରାଯିବା ସମ୍ଭବ ହୋଇଛି। ସ୍ଥାନୀୟ ଲୋକମାନେ ମଧ୍ୟ ଉଦ୍ଧାର କାର୍ଯ୍ୟରେ ସହଯୋଗ କରିଥିଲେ। ପୁଲିସ ସୂତ୍ରରୁ ଆହୁରି ଜଣାପଡ଼ିଛି ଯେ ଜାହାଜଟି ଅଚାନକ କୂଳ ଆଡ଼କୁ ଚାଲି ଆସିଥିଲା। ଫଳରେ କୂଳ ନିକଟରେ ଅଧିକ ପଟୁମାଟି ଥିବା କାରଣରୁ ସେଠାରେ ଅଟକି ପଡ଼ିଥିଲା ଏବଂ ଧୀରେ ଧୀରେ ଜାହାଜଟି ବୁଡ଼ିବାକୁ ଆରମ୍ଭ କରିଥିଲା।
ମହିଷାଦଳ ଥାନା ଅଧିକାରୀ ପାର୍ଥ ବିଶ୍ୱାସ କହିଛନ୍ତି ଯେ ସକାଳେ ଖବର ମିଳିବା ମାତ୍ରେ ପୁଲିସ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲା। ସଙ୍ଗେ ସଙ୍ଗେ ମେରିନ୍ ପୁଲିସକୁ ଖବର ଦେବାରୁ ସେମାନେ ଆସି ଉଦ୍ଧାର କାର୍ଯ୍ୟ ଚଳାଇଥିଲେ।
