କରୋନା ଯୁଦ୍ଧରେ ପୁଲିସ ଯୋଦ୍ଧା

ନୟାଗଡ଼ :ସମାଜରେ ଦେଖା ଯାଉଥିବା ବିଭିନ୍ନ ବିପର୍ଯ୍ୟୟ କାଳରେ ଲୋଡ଼ାପଡ଼େ ପୁଲିସ ।  ବିଭିନ୍ନ ପ୍ରତିକୂଳ ପରିସ୍ଥିତିରେ ସେମାନେ ଲୋକଙ୍କ ପାଖରେ ସହାୟତା ଯୋଗାଇଥାନ୍ତି । ଯେମିତି ଏବେ ଲୋକମାନେ ଘର ଭିତରେ ଗୃହବନ୍ଦୀ ହୋଇ ସତର୍କ ରହୁଥିବା ବେଳେ ନିଜ ଜୀବନକୁ ବାଜି ଲଗାଇ ପୁଲିସ ରାସ୍ତା ଉପରେ ଲୋକଙ୍କ ସ୍ବାର୍ଥକୁ ଜଗିଛି ।
ସାମାଜିକ ଦୂରତାକୁ ପ୍ରାଥମିକତା ଦିଆଯାଉଥିଲେ ମଧ୍ୟ ସେମାନେ ପ୍ରତିଦିନ ଶହଶହ ଲୋକଙ୍କ ସଂସ୍ପର୍ଶରେ ଆସୁଛନ୍ତି । ଅମାନିଆ ଗାଡ଼ି ଚାଳକଙ୍କୁ ରାସ୍ତାରେ ଅଟକାଇ ଯାଞ୍ଚ କରୁଛନ୍ତି । ଏସବୁ କେବଳ ଲୋକଙ୍କ ସୁରକ୍ଷା ପାଇଁ କରାଯାଉଛି । ଖରା-ବର୍ଷାକୁ ଖାତିର ନକରି ସେମାନେ ଲୋକଙ୍କ ପାଇଁ ନିଜ ଜୀବନକୁ ବାଜି ଲଗାଇ ଦେଇଛନ୍ତି ଏହି ଯୁଦ୍ଧରେ ।
ତେଣୁ ପୁଲିସ କର୍ମଚାରୀଙ୍କୁ ସମ୍ମାନ ଦେବା ସହ ସେମାନଙ୍କୁ ସହଯୋଗ କରିବା ଆବଶ୍ୟକ । ବିନା କାରଣରେ ସେମାନଙ୍କୁ ଅପମାନିତ ନକରି ଆନ୍ତରିକତା ସହ ସହଯୋଗ କରିବା ଦରକାର । ପୁଲିସର ଏଭଳି କାର୍ୟ୍ୟକୁ ସାଧାରଣରେ ବେଶ ପ୍ରଶଂସା କରାଯାଉଛି ।
ସ୍ୱାସ୍ଥ୍ୟ କର୍ମଚାରୀମାନେ ରୋଗୀଙ୍କ ନିକଟତର ହୋଇ ସେବା କରୁଥିବାରୁ ସେମାନଙ୍କ ସଂକ୍ରମିତ ହେବାର ସମ୍ଭାବନା ରହିଛି । ଏନେଇ ସେମାନଙ୍କ ସ୍ୱାସ୍ଥ୍ୟ ବିଷୟରେ ରାଜ୍ୟ ସରକାର ଚିନ୍ତା କରି ଇନ୍‌ସୁରାନ୍ସ ବ୍ୟବସ୍ଥା କରିଛନ୍ତି । ସେହିପରି ପୁଲିସ କର୍ମଚାରୀମାନେ କାର୍ଯ୍ୟ ସମୟରେ ସବୁବେଳେ ଲୋକଙ୍କ ସଂସ୍ପର୍ଶରେ ଆସୁଛନ୍ତି । ସେମାନେ ମଧ୍ୟ ସଂକ୍ରମିତ ହେବାର ସମ୍ଭାବନା ରହିଛି । ତେଣୁ ସେମାନଙ୍କ ସ୍ୱାସ୍ଥ୍ୟ ବିଷୟରେ ରାଜ୍ୟ ସରକାର ଚିନ୍ତା କରିବା ଆବଶ୍ୟକ ବୋଲି ବୁଦ୍ଧିଜୀବୀମାନେ ମତ ଦେଇଛନ୍ତି ।