ୱାଶିଂଟନ: କରୋନା ଭୂତାଣୁର ପ୍ରକୋପ ବିଶ୍ଵବ୍ୟାପୀ ଜାରି ରହିଛି। ତେବେ ଏଥିରେ ସବୁଠୁ ଅଧିକ କ୍ଷତିଗ୍ରସ୍ତ ହୋଇଛନ୍ତି ଭାରତ ଏବଂ ଆମେରିକା । ତେବେ ଆମେରିକା ମହାମାରୀ ବିରୋଧୀ ଲଢ଼େଇରେ ଆଉ ପାଦେ ଆଗକୁ ଯାଇ ଏକ ବଡ଼ ପଦକ୍ଷେପ ନେଇଛି। ଦେଶରେ ୧୨ରୁ ୧୫ ବର୍ଷର ପିଲାମାନଙ୍କୁ ଟିକା ଦେବାକୁ ଆମେରିକା ନିଷ୍ପତ୍ତି ନେଇଛି। ଆମେରିକାର ଖାଦ୍ୟ ଏବଂ ଔଷଧ ପ୍ରଶାସନ (ଏଫଡିଏ) ୧୨ରୁ ୧୫ ବର୍ଷର ପିଲାମାନଙ୍କ ପାଇଁ ପିଫାଇଜର କରୋନା ଟିକାକୁ ଜରୁରୀ ବ୍ୟବହାର ଲାଗି ମଞ୍ଜୁରୀ ପ୍ରଦାନ କରିଛି।
ଏଫଡିଏର କାର୍ଯ୍ୟକାରୀ ଆୟୁକ୍ତ ଡା. ଜେନେଟ ବୁଡ୍କକ୍ କହିଛନ୍ତି ଯେ, କରୋନା ଟିକାର ବ୍ୟବହାରକୁ ନେଇ ନିଆଯାଇଥିବା ଏହି ନିଷ୍ପତ୍ତି ଆମକୁ ସାଧାରଣ ସ୍ଥିତିକୁ ଫେରିବାରେ ସହାୟତା କରିବ। ସବୁ ତଥ୍ୟର ଗଭୀର ସମୀକ୍ଷା କରାଯିବା ପରେ ଏହି ନିଷ୍ପତ୍ତି ନିଆଯାଇଥିବାରୁ ପିଲାମାନଙ୍କ ମା’ବାପା ଏବଂ ଅଭିଭାବକମାନେ ଅଶ୍ଵସ୍ତ ରୁହନ୍ତୁ।
ସୂଚନାଯୋଗ୍ୟ, ଏଫଡିଏ ପୂର୍ବରୁ ୧୬ ବର୍ଷ ଏବଂ ତା’ଠାରୁ ଅଧିକ ବୟସର ପିଲାଙ୍କ ପାଇଁ ପିଫାଇଜର ଟିକା ଦେବାକୁ ମଞ୍ଜୁରୀ ଦେଇଥିଲା। ତେବେ ଏହି ଟିକା ଛୋଟ ପିଲାମାନଙ୍କ ଉପରେ ବି ଭଲ ଭାବେ କାର୍ଯ୍ୟ କରୁଥିବା କମ୍ପାନୀ ଜାଣିବାକୁ ପାଇଥିଲା। ଏହା ପରେ ସରକାର ଏହି ଘୋଷଣା କରିଛନ୍ତି।
ତେବେ ଭାରତରେ କରୋନାର ୩ୟ ତରଙ୍ଗ ଆସିବା ନେଇ ଏବେଠୁ ବିଶେଷଜ୍ଞମାନେ ଚେତାବନୀ ଦେଇସାରିଛନ୍ତି। ଏହାର ମୁକାବିଲା ପାଇଁ ବି ସରକାର ଏବେଠାରୁ ପ୍ରସ୍ତୁତ ହେଉଛନ୍ତି। ବିଶେଷଜ୍ଞମାନଙ୍କ କହିବା ଅନୁସାରେ, ୩ୟ ତରଙ୍ଗ ସମୟରେ ପିଲାମାନେ ବେଶୀ ପ୍ରଭାବିତ ହେବେ। ଏଭଳି ପରିସ୍ଥିତିରେ ଆମେରିକା ନେଇଥିବା ପଦକ୍ଷେପ ଭାରତ ପାଇଁ ବହୁ ଗୁରୁତ୍ଵପୂର୍ଣ୍ଣ ବୋଲି କୁହାଯାଉଛି।
