ଅମୃତସର: ପଞ୍ଜାବର ଅମୃତସର ସ୍ଥିତ ପୋଶ୍ କଲୋନୀ ରଞ୍ଜିତ ଆଭେନ୍ୟୁରେ ମଙ୍ଗଳବାର ସକାଳେ ମୁଖା ପିନ୍ଧିଥିବା ୨ ବାଇକ୍ ଆରୋହୀ ଏକ ବୋଲେରୋ ତଳେ ବୋମା ଲଗାଉଥିବା ବେଳେ ସିସିଟିଭି କ୍ୟାମେରାରେ କଏଦ୍ ହୋଇଛନ୍ତି। ସେହି ବାଟରେ ଯାଉଥିବା ଜଣେ ଯୁବକ ମୁଖାପିନ୍ଧା ଯୁବକମାନଙ୍କ ସନ୍ଦେହଜନକ କାର୍ଯ୍ୟକଳାପ ଲକ୍ଷ୍ୟ କରିଥିଲେ। ଦୁହେଁ ବୋଲେରୋ କାର ତଳେ କିଛି ରଖୁଥିବା ମଧ୍ୟ ଯୁବକ ଜଣକ ଦେଖିଥିଲେ। ପରେ ଗାଡ଼ି ମାଲିକଙ୍କୁ ଏନେଇ ସୂଚନା ଦେଇଥିଲେ।
ଗାଡ଼ ମାଲିକ ତୁରନ୍ତ ପୁଲିସକୁ ଏହି ସୂଚନା ଦେଇଥିଲେ। ପୁଲିସ ଘଟଣାସ୍ଥଳରେ ପହଞ୍ଚି ବୋଲେରୋକୁ ଜବତ କରିବା ସହ ସମସ୍ତ ଲୋକଙ୍କୁ ସେଠାରୁ ହଟାଇ ଦେଇଥିଲେ। ଘଟଣାସ୍ଥଳରେ ଲାଗିଥିବା ସିସିଟିଭି ଯାଞ୍ଚ କରିବା ପରେ ଜଣାପଡିଛି ଯେ, ବାଇକରେ ଆସି ଜଣେ ଯୁବକ ବୋଲେରୋ କାର ତଳେ କିଛି ରଖୁଛନ୍ତି। ଅନ୍ୟପକ୍ଷରେ, ଆଉ ଜଣେ ଯୁବକ ମୋଟରସାଇକେଲକୁ ଆଗରୁ ବୁଲାଇ ପଛକୁ ଆସୁଛନ୍ତି ଏବଂ ବୋମା ଲଗାଇବା ପରେ ଉଭୟ ଯୁବକ ଫେରାର ହୋଇଯାଉଛନ୍ତି। ପୁଲିସ ଉଭୟଙ୍କୁ ଖୋଜିବା ଆରମ୍ଭ କରିଛି।
