ଚୌଦ୍ୱାର : ଅଂଚଳର ଦୂରାରୋଗୀ ମାନଙ୍କୁ ତିନି ଚକିଆ ସାଇକେଲ ବଣ୍ଟନ ଏବଂ ଅବସର ଗ୍ରହଣ କରିଥିବା ଚୌଦ୍ୱାର ପୌର ପାଳିକାର କର୍ମଚାରୀ ମାନଙ୍କୁ ବକେୟା ପେନସନ୍ ଓ ଗ୍ରାଚୁଇଟି ପ୍ରଦାନ ଉତ୍ସବ ଗୁରୁବାର ଅନୁଷ୍ଠିତ ହୋଇ ଯାଇଛି । ପୌର ନିର୍ବାହୀ ଅଧିକାରୀ ସଂଜୀବ କୁମାର ମହାପାତ୍ରଙ୍କ ପୌରୋହିତ୍ୟରେ ଗନ୍ଧୀଛକସ୍ଥିତ ପୌର ଟାଉନହଲରେ ଆୟୋଜିତ ଏହି କାର୍ଯ୍ୟକ୍ରମରେ ଚୌଦ୍ୱାର-କଟକ ବିଧାୟକ ସୌଭିକ ବିଶ୍ୱାଳ ଅତିଥି ଭାବେ ଯୋଗଦେଇ ପ୍ରଥମ ପର୍ଯ୍ୟାୟରେ ୩୨ ଜଣ ଅବସରପ୍ରାପ୍ତ କର୍ମଚାରୀଙ୍କୁ ସେମାନଙ୍କ ପେନସନ୍ ଓ ଗ୍ରାଚୁଇଟି ବାବଦକୁ ମୋଟ ୭୦ ଲକ୍ଷ ଟଙ୍କାର ଚେକ୍ ବଣ୍ଟନ କରିଥିଲେ ।ସୂଚନାଯୋଗ୍ୟଯେ, ଏହି କର୍ମଚାରୀ ମାନେ ଅଜକୁ ୧୫ ବର୍ଷ ହେଲା ଅବସରଗ୍ରହଣ କରିସାରିଥିଲେହେଁ ଏଯାବତ୍ ସେମାନଙ୍କ ବକେୟା ପ୍ରାପ୍ୟ ପାଇପାରି ନଥିଲେ । ପୌର ଉପାଧ୍ୟକ୍ଷ ଶୁଭେନ୍ଦୁ ସାମଲ ଏଦିଗରେ ସରକାରୀସ୍ତରରେ ପଦକ୍ଷେପ ନେଇ ବକେୟା ପ୍ରାପ୍ୟ ମଞ୍ଜୁର କରିବାର ବ୍ୟବସ୍ଥା କରିଥିବାରୁ କର୍ମଚାରୀ ମାନେ ତାଙ୍କୁ କୃତଜ୍ଞତା ଜଣାଇଥିଲେ । ଏହି ଅବସରରେ ୧୭ ନମ୍ବର ୱାର୍ଡ଼ ତ୍ରିନାଥ ପଲ୍ଲୀର ୧୭ଜଣ ଦୂରାରୋଗୀଙ୍କୁ ପୌରପାଳିକା ତରଫରୁ ୧୭ଟି ତିନି ଚକିଆ ସାଇକେଲ ବଣ୍ଟନ କରାଯାଇଥିଲା । ୱାର୍ଡ଼ କାଉନସିଲର ଆଶୁତୋଷ ଦାସଙ୍କ ତତ୍ୱାବଧାନରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ପୌରାଧ୍ୟକ୍ଷା ମାନସୀ ସ୍ୱର୍ଣ୍ଣପ୍ରଭା ସାମଲ, ଉପାଧ୍ୟକ୍ଷ ଶୁଭେନ୍ଦୁ ସାମଲ, ସାଂସଦ ପ୍ରତିନିଧି ପ୍ରେମଚାନ୍ଦ ନାୟକ,ନଗର ବିଜେଡ଼ି ସଭାପତି ବିଷ୍ଣୁ ଚରଣ ପରିଡ଼ାଙ୍କ ସମେତ ବହୁ କାଉନସିଲର ଓ ପୌର କର୍ମଚାରୀ ଏଥିରେ ଉପସ୍ଥିତ ଥିଲେ ।ପୌର ସାମାଜିକ ସୁରକ୍ଷା ଅଧିକାରୀ ସନ୍ତୋଷ କୁମାର ପାଣି କାର୍ଯ୍ୟକ୍ରମ ପରିଚାଳନା କରିଥିଲେ ।
Popular Categories
Previous article
Next article