ଢେଙ୍କାନାଳ: ବାୟୁ ମଣ୍ଡଳରୁ ଅମ୍ଳଜାନ ଦିନକୁ ଦିନ ହ୍ରାସ ପାଇବାରେ ଲାଗିଛି । ଏଣୁ ରାଜ୍ୟ ଓ କେନ୍ଦ୍ର ସରାକର ବୃକ୍ଷ ରୋପଣ ପାଇଁ ଲୋକଙ୍କୁ ସଚେତନ କରିବା ସହ ବିଭିନ୍ନ କାର୍ଯ୍ୟକ୍ରମ ଆୟୋଜନ କରୁଛନ୍ତି । ହେଲେ ଅନ୍ୟପଟରେ ବିୟର ଫ୍ୟାକ୍ଟ୍ରି ନିର୍ମାଣ ପାଇଁ ବେଧଡକ ଗଛ କାଟିବା ପାଇଁ ରାଜ୍ୟ ସରାକର ଅନୁମତି ଦେଇଛନ୍ତି । ଏହାକୁ ଅକ୍ଷରେ ଅକ୍ଷରେ ପାଳନ କରୁଛି ଜିଲା ପ୍ରଶାସନ । ବିୟର ଫ୍ୟାକ୍ଟ୍ରି ନିର୍ମାଣ ପାଇଁ ଜଙ୍ଗଲରୁ ପ୍ରାୟ ୯୫୮ଟି ବଡ଼ ଗଛ କଟାଯାଉଛି । ଏହାକୁ ସ୍ଥାନୀୟ ଲୋକ ବିରୋଧ କରିବାରୁ ସେମାନଙ୍କୁ ଲାଠି ପାହାର ମଧ୍ୟ ଖାଇବାକୁ ପଡିଛି । ଏଭଳି ଅଭିଯୋଗ ଆଣିଛନ୍ତି ସ୍ଥାନୀୟ ବାସିନ୍ଦା।
ଢେଙ୍କାନାଳ ଜିଲା ସଦର ଥାନା ଅନ୍ତର୍ଗତ ବଳରାମପୁର ଗ୍ରାମ୍ୟ ଜଙ୍ଗଲରେ ଗଛ କଟା ବେଧଡକ ଚାଲିଛି । ଏହାକୁ ବିରୋଧ କରି ପୁଲିସ ଓ ସ୍ଥାନୀୟ ମହିଳା ମୁହାଁମୁହିଁ ହୋଇଛନ୍ତି । ବିୟର ଫ୍ୟାକ୍ଟ୍ରି ନିର୍ମାଣ ପାଇଁ ଶନିବାର ଜମି ଅଧିଗ୍ରହଣ ଚାଲିଥିବା ବେଳେ ସ୍ଥାନୀୟ ବାସିନ୍ଦା ଏହାକୁ ବିରୋଧ କରିଥିଲେ । ମହିଳାମାନେ ହାତରେ ଠେଙ୍ଗା ଧରି ଗଛ କଟାକୁ ବିରୋଧ କରିଛନ୍ତି । ପୁଲିସ ଓ ମହିଳାଙ୍କ ଧସ୍ତାଧସ୍ତି ବେଳେ ଅପ୍ରୀତିକର ପରିସ୍ଥିତି ସୃଷ୍ଟି ହୋଇଛି । ମହିଳାମାନେ ଗଛକୁ ଜାବୁଡି ଧରି ଗଛ କାଟିବାକୁ ଦେଉ ନଥିବା ଦେଖିବାକୁ ମିଳିଛି ।
