ନୂଆଦିଲ୍ଲୀ,୮ା୨: ସରକାରୀ ବଙ୍ଗଳା ଖାଲି କରିବା ନେଇ ପାଟନା ହାଇକୋର୍ଟଙ୍କ ନିର୍ଦେଶକୁ ଚ୍ୟାଲେଞ୍ଜ କରି ବିହାରର ପୂର୍ବତନ ଉପମୁଖ୍ୟମନ୍ତ୍ରୀ ତଥା ଆରଜେଡି ମୁଖ୍ୟ ଲାଲୁ ଯାଦବଙ୍କ ପୁଅ ତେଜସ୍ବୀ ଯାଦବ କରିଥିବା ଆବେଦନକୁ ସୁପ୍ରିମକୋର୍ଟ ଶୁକ୍ରବାର ଖାରଜ କରିଦେଇଛନ୍ତି। ଉପମୁଖ୍ୟମନ୍ତ୍ରୀଙ୍କ ପାଇଁ ଉଦ୍ଦିଷ୍ଟ ସରକାରୀ ବଙ୍ଗାଳା ତୁରନ୍ତ ଖାଲି କରିବାକୁ ସର୍ବୋଚ୍ଚ ଅଦାଲତ ତାଙ୍କୁ ନିର୍ଦେଶ ଦେଇଛନ୍ତି। ଏ ସମ୍ବନ୍ଧୀୟ ଆବେଦନକୁ ପାଟନା ହାଇକୋର୍ଟର ଦୁଇଟି ପୀଠ ଖାରଜ କରିବା ପରେ ମଧ୍ୟ ସୁପ୍ରିମକୋର୍ଟରେ ଆବେଦନ କରି ଅଦାଲତଙ୍କ ସମୟ ନଷ୍ଟ କରିଥିବା ଦର୍ଶାଇ ପ୍ରଧାନ ବିଚାରପତି ରଞ୍ଜନ ଗୋଗଇ, ବିଚାରପତି ଦୀପକ ଗୁପ୍ତା ଓ ସଞ୍ଜୀବ ଖାନ୍ନାଙ୍କ ପୀଠ ତେଜସ୍ବୀଙ୍କ ବିରୋଧରେ ୫୦,୦୦୦ ଟଙ୍କାର ଜୋରିମାନା କରିଛନ୍ତି। ଉଲ୍ଲେଖ ଯେ, ୨୦୧୫ରେ ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ନେତୃତ୍ବାଧୀନ ଜେଡିୟୁ-ଆରଜେଡି ମେଣ୍ଟ ସରକାରରେ ତେଜସ୍ବୀ ଉପମୁଖ୍ୟମନ୍ତ୍ରୀ ନିଯୁକ୍ତ ହେବା ପରେ ତାଙ୍କୁ ଏହି ବଙ୍ଗଳା ପ୍ରଦାନ କରାଯାଇଥିଲା। ମାତ୍ର ଏକ ରାଜନୈତିକ କନ୍ଦଳ କ୍ରମେ ଜେଡିୟୁ -ଆରଜେଡି ମେଣ୍ଟ ଭାଙ୍ଗିବା ପରେ ଆରଜେଡି କ୍ଷମତା ହରାଇଥିଲା। ନୀତୀଶଙ୍କ ନେତୃତ୍ବରେ ଏନ୍ଡିଏ ରାଜ୍ୟରେ ସରକାର ଗଠନ କରିବା ପରେ ବିଜେପି ନେତା ସୁଶୀଲ ମୋଦୀ ଉପମୁଖ୍ୟମନ୍ତ୍ରୀ ନିଯୁକ୍ତ ହୋଇଥିଲେ। ତାଙ୍କୁ ଉପମୁଖ୍ୟମନ୍ତ୍ରୀଙ୍କ ପାଇଁ ଉଦ୍ଦିଷ୍ଟ ବଙ୍ଗଳା ପ୍ରଦାନ କରିବା ନିମନ୍ତେ ରାଜ୍ୟ ସରକାର ତେଜସ୍ବୀଙ୍କୁ ବଙ୍ଗଳା ଛାଡିବାକୁ କହିଥିଲେ।
