ମୁମ୍ବଇ: କରୋନା ଭାଇରସରୁ ମୁକ୍ତି ପାଇବା ପାଇଁ ଭାରତ ସହ ଅନ୍ୟ ଦେଶମାନେ ମଧ୍ୟ ଯଥା ସମ୍ଭବ ଉଦ୍ୟମ କରୁଛନ୍ତି। ଦୀର୍ଘ ଦିନ ଧରି ଅନେକ କାର୍ଯ୍ୟ ବନ୍ଦ ରହିବା ପରେ ଏବେ ଧିରେଧିରେ ସବୁକିଛି ଅନ୍ଲକ୍ ହୋଇ ସ୍ଥିତି ପୂର୍ବପରି ହେବା ଆରମ୍ଭ କରିଛି। ଇତି ମଧ୍ୟରେ ଖବର ମିଳିଛି ଯେ, ୨୦୧୮ରେ ମୁକ୍ତିଲାଭ କରିଥିବା ରଣବୀର ସିଂହଙ୍କ ଚଳଚ୍ଚିତ୍ର ‘ସିମ୍ବା’କୁ ଫିଜି ଓ ଅଷ୍ଟ୍ରେଲିଆରେ ପୁନଃ ରିଲିଜ୍ କରାଯାଉଛି। ଏହା ପୂର୍ବରୁ ନ୍ୟୁଜିଲାଣ୍ଡର ପ୍ରେକ୍ଷାଳୟରେ ଅଜୟ ଦେବଗନଙ୍କ ଫିଲ୍ମ ‘ଗୋଲ୍ମାଲ୍ ଏଗେନ୍’ ରିଲିଜ୍ ହୋଇସାରିଛି। ଏହି ଦୁଇ ଚଳଚ୍ଚିତ୍ରର ନିର୍ଦ୍ଦେଶକ ରୋହିତ ଶେଟ୍ଟୀ।
ରଣବୀର ସାମାଜିକ ଗଣମାଧ୍ୟମରେ ଫିଲ୍ମର ଫଟୋ ଶେୟାର କରି ସୂଚନା ଦେଇଛନ୍ତି ଯେ, ‘ସିମ୍ବା’ ଫିଜିରେ ତ ରିଲିଜ୍ ହୋଇସାରିଛି, କିନ୍ତୁ ଅଷ୍ଟ୍ରେଲିଆରେ ୨ ଜୁଲାଇରେ ରିଲିଜ୍ ହେବ। ରଣବୀରଙ୍କ ଏହି ଆକ୍ସନ-ଡ୍ରାମା ଚଳଚ୍ଚିତ୍ରକୁ ଭାରତରେ ଖୁବ୍ ସଫଳତା ମିଳିଥିଲା। ଦେଶରେ ଏହା ଭଲ ବ୍ୟବସାୟ ମଧ୍ୟ କରିଥିଲା। ଏଥିରେ ରଣବୀରଙ୍କ ସହ ସାରା ଅଲ୍ଲୀ ଖାନ ନାୟିକା ଭାବେ ନଜର ଆସିଥିଲେ।
