ସମ୍ବଲପୁର: ଆଗାମୀ ଶୀତଳଷଷ୍ଠୀ ଉତ୍ସବକୁ ଧ୍ୟାନରେ ରଖି ସମ୍ବଲପୁର ପୁଲିସ ପକ୍ଷରୁ ଆରମ୍ଭ କରାଯାଇଥିବା ନିଶା ବିରୋଧି ଅଭିଯାନ କ୍ରମରେ ଧନୁପାଲି ପୁଲିସ ପକ୍ଷରୁ ୨ଟି ସ୍ଥାନରେ ଚଢ଼ଉ କରାଯାଇ ବିପୁଳ ନିଶା ଦ୍ରବ୍ୟ ଜବତ କରାଯାଇଛି। ଏ ସମ୍ପର୍କରେ ମୋଟ ୭ ଜଣଙ୍କୁ ଗିରଫ କରାଯିବା ସହିତ ଏକ ଦାମୀକିଆ କାର, ବୁଲେଟ ଓ ମୋବାଇଲ ଆଦି ଜବତ କରାଯାଇଛି।
ପ୍ରଥମ ଘଟଣାରେ ଧନୁପାଲି ପୁଲିସ ପେଟ୍ରୋଲିଂ ସମୟରେ ଖବର ପାଇ ସରଲା ଛକ ନିକଟରେ ଚଢ଼ଉ କରିଥିଲା। ଚଢ଼ଉ ସମୟରେ କିଛି ଯୁବକ ବେଆଇନ ଭାବରେ ଏକ କାରରେ ବିଭିନ୍ନ ପ୍ରକାରର ମାଦକ ଦ୍ରବ୍ୟ ରଖିଥିଲେ। ପୁଲିସ ଯାଞ୍ଚ ସମୟରେ ଘଟଣାସ୍ଥଳରୁ ପୁଲିସକୁ ୪୨ ଲିଟର ଦେଶୀ ମଦ, ୪୮ଟି ନିଶା କଫ ସିରପ, ୮୦୦ ମିଲିଲିଟର ଅପମିଶ୍ରିତ ନିଶା ଦ୍ରବ୍ୟ, ୪ଟି ନିଶା ବଟିକା ଷ୍ଟ୍ରିପ, ଗୋଟିଏ ଦାମୀକିଆ କାର, ୪ଟି ମୋବାଇଲ ଫୋନ ମିଳିଥିଲା।
ମାଦକ ଦ୍ରବ୍ୟ ରଖିଥିବା ସମ୍ପର୍କରେ କୌଣସି କାଗଜପତ୍ର ଦେଖାଇ ନ ପାରିବାରୁ ପୁଲିସ ପୁଟିବନ୍ଧ ନିବାସୀ ଜ୍ଞାନେଶ୍ୱର ମହାକୁଡ (୨୦), ଅମୂଲ୍ୟ ମହାରଣା (୨୮), ମୋହିତ ବେହେରା (୧୯), ଡୁମେରପଡା (ଶାସନ ଥାନା) ନିବାସୀ ରାଜୁ ମହାନନ୍ଦ (୨୫) ଓ ସିକ୍ରାପାଲି ନିବାସୀ ଜନ୍ମେଜୟ ପ୍ରଧାନ (୨୯) ଙ୍କୁ ଗିରଫ କରିଥିଲା।
ଧରାପଡ଼ିଥିବା ଯୁବକ ମାନଙ୍କ ମଧ୍ୟରେ ଅମୂଲ୍ୟ ମହାରଣା ନାମରେ ପୁର୍ବରୁ ବିଭିନ୍ନ ଥାନା ଗୁଡିକରେ ବିଭିନ୍ନ ପ୍ରକାରର ୯ଟି ମାମଲା ଓ ରାଜୁ ମହାନନ୍ଦ ନାମରେ ୧୦ଟି ମାମଲା ରହିଛି। ଏ ନେଇ ଏକ ମାମଲା ରୁଜୁ କରି ଅଭିଯୁକ୍ତ ମାନଙ୍କୁ ଅଦାଲତକୁ ଚାଲାଣ ଧନୁପାଲି ପୁଲିସ କରିଛି।
ସେହିଭଳି ଦ୍ୱିତୀୟ ଘଟଣାରେ ସ୍ଥାନୀୟ ଖଲିଆବନ୍ଧ ଅଞ୍ଚଳରେ ପୁଲିସ ପେଟ୍ରୋଲିଂ ସମୟରେ ନିଶା ଦ୍ରବ୍ୟ କାରବାର ଚାଲିଥିବାର ଖବର ପାଇ ଚଢ଼ଉ କରାଯାଇଥିଲା। ଖଲିଆପାଲି ଆମ୍ବୁ ବୁରେଇ ଅଞ୍ଚଳରେ ବେଆଇନ ଭାବରେ ନିଶା ଦ୍ରବ୍ୟ ରଖିଥିବା ସଦର ଥାନା ଅଞ୍ଚଳର ରାସନପୁର ନିବାସୀ ମହେଶ କୁମାର ନାଏକ (୨୩) ଏବଂ ତାଲପାଲି ନିବାସୀ ପ୍ରବୀଣ ଗର୍ଡିଆ (୨୪) ଙ୍କୁ ଧରିଥିଲା। ଧରାପଡ଼ିଥିବା ଯୁବକମାନଙ୍କ ନିକଟରୁ ପୁଲିସ ୧୫ ଲିଟର ଦେଶୀ ମଦ, ୩୮ଟି ନିଶା କଫ ସିରପ, ୧ ଲିଟର ଅପମିଶ୍ରିତ ନିଶା ଦ୍ରବ୍ୟ, ୪ଟି ନିଶା ବଟିକା ଷ୍ଟ୍ରିପ, ଗୋଟିଏ ବୁଲେଟ ମୋଟର ସାଇକେଲ ଏବଂ ୨ଟି ମୋବାଇଲ ଫୋନ ଜବତ କରିଥିଲା।
ଏଣୁ ପୁଲିସ ଏକ ମାମଲା ରୁଜୁ କରି ଅଭିଯୁକ୍ତ ମାନଙ୍କୁ ଗିରଫ କରି ଅଦାଲତକୁ ଚାଲାଣ କରିଛି। ଅପରପକ୍ଷରେ ଏହି ଯୁବକ ମାନେ ଅଧିକ ଲାଭ ଆଶାରେ ବିଭିନ୍ନ ପ୍ରକାରର ମାଦକ ଦ୍ରବ୍ୟ ଗୁଡିକୁ ମିଶାଇ ନିଶା ଅଭ୍ୟାସ ଥିବା ବ୍ୟକ୍ତି ମାନଙ୍କୁ ବିକ୍ରି କରୁଥିଲେ ବୋଲି ପୁଲିସ ସମ୍ମୁଖରେ ସ୍ୱିକାର କରିଥିଲେ।
