ସମ୍ବଲପୁର : ସମ୍ବଲପୁର ପୋକ୍ସୋ ଅଦାଲତ ବିଚାରପତି ରୋହିତ ଲାଲ ପଣ୍ଡାଙ୍କ ଦ୍ୱାରା ଏକ ଦୁଷ୍କର୍ମ ମାମଲାରେ ଦୋଷୀକୁ ୨୦ ବର୍ଷର ସଶ୍ରମ କାରାଦଣ୍ଡ ପ୍ରଦାନ କରିଛନ୍ତି। ୨୦୧୯ ମସିହାରେ ଶାସନ ଥାନା ଅନ୍ତର୍ଗତ ଅଞ୍ଚଳରେ ନାବାଳିକା ଅନ୍ୟ ଏକ ଗ୍ରାମରୁ ପାଠ ପଢ଼ି ଫେରୁଥିବା ସମୟରେ ଦୁଷ୍କର୍ମକାରୀ ଜିତେଶ ସାହୁ ପିଡିତାକୁ ଜଙ୍ଗଲ ମଧ୍ୟରେ ଅଟକାଇ ଜୋରଜବରଦସ୍ତି ଜଙ୍ଗଲକୁ ଟାଣି ନେଇ ଦୁଷ୍କର୍ମ କରିଥିଲା। ପିଡିତାକୁ ଏ ସମ୍ପର୍କରେ କାହାରିକୁ ନ କହିବାକୁ ଧମକଚମକ ଦେଇଥିଲା।
ତେବେ ପିଡିତା ପରିବାରବର୍ଗଙ୍କୁ ଜଣାଇବାରୁ ଶାସନ ଥାନାରେ ଏ ସମ୍ପର୍କରେ ଅଭିଯୋଗ ହୋଇଥିଲା। ଏହାପରେ ଶାସନ ଥାନାରେ ଏକ ମାମଲା ରୁଜୁ କରାଯାଇ ଘଟଣାର ତଦନ୍ତ ଆରମ୍ଭ ହୋଇଥିଲା ଏବଂ ଅଭିଯୁକ୍ତକୁ ଗିରଫ କରାଯାଇଥିଲା। ଶୁକ୍ରବାର ପୋକ୍ସୋ ଅଦାଲତ ୧୮ ଜଣ ସାକ୍ଷୀ ଓ ୨୨ଟି ଦସ୍ତାବିଜ ଗୁଡିକୁ ଅନୁଧ୍ୟାନ କରିବା ପରେ ଅଭିଯୁକ୍ତ ଜିତେଶ ସାହୁକୁ ଦୋଷୀ ସାବ୍ୟସ୍ତ କରିବା ସହ ୨୦ ବର୍ଷ ସଶ୍ରମ କାରାଦଣ୍ଡ ଏବଂ ୨୫ ହଜାର ଟଙ୍କାର ଦଣ୍ଡାଦେଶ ଶୁଣାଇଛନ୍ତି। ଏହି ମାମଲାକୁ ସରକାରୀ ଓକିଲ ବସନ୍ତ ମିଶ୍ର ପରିଚାଳନା କରୁଥିଲେ।
