ସମ୍ବଲପୁର: ସାରା ରାଜ୍ୟରେ ମୋଟରଯାନ ନିୟମ ଉଲ୍ଲଂଘନକାରୀ ଯାନବାହାନ ଗୁଡିକ ଉପରେ ପରିବହନ ବିଭାଗ ପକ୍ଷରୁ ଚଢ଼ାଉ ଅଭିଯାନ ଆରମ୍ଭ କରାଯାଇଛି । ଏହି କ୍ରମରେ ବିଗତ ଦିନରେ ସମ୍ବଲପୁର ଜିଲାରେ ମଧ୍ୟ ମୋଟରଯାନ ନିୟମ ଉଲ୍ଲଂଘନକାରୀ ମାନଙ୍କୁ ନିୟନ୍ତ୍ରିତ କରିବା ପାଇଁ ଚଢ଼ଉ କରାଯାଉଛି । ୩୦ ତାରିଖରେ ସ୍ୱତନ୍ତ୍ର ଅଭିଯାନ କରାଯାଇ ୩ଟି ଯାତ୍ରୀବାହୀ ଯାନ ଗୁଡିକୁ ନିୟମ ଉଲ୍ଲଂଘନ କରୁଥିବାରୁ ମୋଟା ଅଙ୍କର ଜରିମାନା କରାଯାଇଥିଲା । ସେହିଭଳି ଗୁରୁବାର ରାତ୍ରିରେ ଜିଲା ଦେଇ ଯାଇଥିବା ବିଭିନ୍ନ ଗୁରୁତ୍ୱପୂର୍ଣ୍ଣ ରାଜପଥ ଗୁଡିକରେ ସମ୍ବଲପୁର ଆଞ୍ଚଳିକ ପରିବହନ ବିଭାଗ ପକ୍ଷରୁ ୩ଟି ସ୍ୱତନ୍ତ୍ର ଦଳ ଗଠନ କରାଯାଇ ଅଚାନକ ଚଢ଼ଉ କରାଯାଇଥିଲା । ଏହି ଚଢ଼ଉ ଅଭିଯାନ ସମୟରେ ସମୁଦାୟ ୫୯ଟି ଯାନବାହନିକୁ ଚେକିଂ କରାଯାଇଥିଲା ।
ଚେକିଂ ସମୟରେ ୪୮ଟି ଯାନ ଗୁଡିକୁ ନିୟମ ଉଲ୍ଲଂଘନ ଅଭିଯୋଗରେ ଜରିମାନା କରାଯାଇଛି । ଗାଡି ଗୁଡିକର ପଞ୍ଜୀକରଣ, ବୀମା, ଅତ୍ୟଧିକ ଓଜନର ମାଲ ପରିବହନ, ଟିକସ ପୈଠ କରି ନଥିବା, ନିଶାପାନ କରି ଗାଡିଚାଳନା ଆଦି ବିଭିନ୍ନ ବିଷୟକୁ ଧ୍ୟାନରେ ରଖାଯାଇଥିଲା । ଏଥି ସହ ୪ଟି ଯାନକୁ ବିଭାଗ ପକ୍ଷରୁ ମୋଟର ନିୟମ ଉଲ୍ଲଂଘନ ପାଇଁ ଜବତ ମଧ୍ୟ କରାଯାଇଛି ବୋଲି ବିଭାଗୀୟ ସୂତ୍ରରୁ ଜଣାପଡ଼ିଛି । ଅଚାନକ ବିଭାଗ ପକ୍ଷରୁ କରାଯାଉଥିବା ଏଭଳି ଚଢ଼ଉ ଅଭିଯାନକୁ ସବୁ ମହଲରେ ସ୍ୱାଗତ କରାଯାଉଥିବା ବେଳେ ଏଭଳି ନିୟମିତ ଚେକିଂ ହେଲେ, ଆଗାମୀ ଦିନରେ ଦୁର୍ଘଟଣା ଜନିତ ଧନଜୀବନ ହାନି ହ୍ରାସ ପାଇବ ଏବଂ ଏହାର ସୁଫଳ ନିଶ୍ଚିତ ପ୍ରତିଫଳିତ ହେବ ବୋଲି ସାଧାରଣରେ ମତପ୍ରକାଶ ପାଇଛି ।
