ରେଙ୍ଗାଲିକ୍ୟାମ୍ପ: ଅତାବିରା ଏନଏସିର ୱାର୍ଡ ନଂ.୪ରେ ଦମ୍ ଦମା ପୋଲ ତଳେ ବହିଯାଇଛି ଏକ ନଳିଆ। ଏହି ନଲିଆକୁ ଅତାବିରା ବସ୍ତି ତଥା ଆଖପାଖ ର ବିଶେଷ କରି ମହିଳା ମାନେ ଗାଧୋଇବାକୁ ଯାଇଥାନ୍ତି। ଏହି ନଲିଆ ଦେଇ ଯାଇଥିବା ରାସ୍ତା ଟି ସିଧା ସଳଖ ପାହାର ଟୋପ_ ଶ୍ରୀଗୀଡା ରାସ୍ତାରେ ଥିବା ସରକାରୀ ଚାଉଳ ଗୋଦାମ ଘର (ଏଫସିଆଇ)କୁ ସଂଯୋଗ କରୁଛି। ଏହି ନଲିଆରେ ପୋଲ ନିର୍ମାଣ ତଥା ଗାଧୁଆ ତୁଠ ସହ ଏକ ବସ୍ତ୍ର ପରିବର୍ତ୍ତନ ଘର ନିର୍ମାଣ ନିମନ୍ତେ ବିଧାୟିକାଙ୍କୁ ଜଣାଇଥିଲେ। ବିଧାୟିକା ଉକ୍ତ ସ୍ଥାନକୁ ଯାଇ ସବୁ କିଛି ଦେଖି ମୁଖ୍ୟ ମନ୍ତ୍ରୀ କର୍ମ ତତ୍ପର ଅଭିଯାନରେ ସହରର ରୂପାନ୍ତରିକରଣ ପାଇଁ ୨୦୨୨/୨୩ ଆର୍ଥିକ ବର୍ଷରେ ସେଠାରେ ଗାଧୁଆ ଘାଟ ଓ ବସ୍ତ୍ର ପରିବର୍ତ୍ତନ ଘର ପାଇଁ ୯୬,୯୦୧ ଟଙ୍କା ଓ ନଲିଆ ଉପରେ ପୋଲ ପାଇଁ ୩,୯୨,୧୩୦ ଟଙ୍କା ଅନୁଦାନ ରାଶି ମଞ୍ଜୁର କରିଥିଲେ।
ଏହା ବ୍ୟତୀତ ଏହି ପୋଲରୁ ଗ୍ୟାସ ଗୋଦାମ ପର୍ଯ୍ୟନ୍ତ ରାସ୍ତାର କଂକ୍ରିଟ କରଣ ପାଇଁ ୧୬,୨୫,୩୮୬ ଟଙ୍କା ଅନୁମୋଦନ କରାଯାଇଥିଲା। ଉକ୍ତ ଅଟକଳ ମୂଲ୍ୟରେ ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ପକ୍ଷରୁ ଏହା ନିର୍ମାଣ ହୋଇଥିଲା। କିନ୍ତୁ ନିର୍ମାଣ ହେବାର ମାତ୍ର କେଇ ମାସ ହୋଇନି,ଅସରାଏ ବର୍ଷାରେ ଆଜି ଏହି ପୋଲ ଉପରେ ଦୁଇ ଫୁଟ ପାଣି ଯିବା ସହ ଗାଧୁଆ ଘର ଓ ବସ୍ତ୍ର ପରିବର୍ତ୍ତନ ଘର ଭିତରେ ମଧ୍ୟ ଦୁଇ ଫୁଟ ପାଣି ଜମି ରହିଥିଲା। ଫଳରେ ମହିଳା ମାନେ ପୁଣି ଯଥା ପୂର୍ବମ୍ ତଥା ପରମ ଅବସ୍ଥାରେ ବାହାରେ ଗାଧୋଇବା ସହ ବାହାରେ ବସ୍ତ୍ର ପରିବର୍ତ୍ତନ କରିବାକୁ ବାଧ୍ୟ ହୋଇଛନ୍ତି। ତେଣୁ ଏହାର ନିର୍ମାଣ କୋଉ କାମକୁ ନୁହଁ ବୋଲି କହି ମହିଳାମାନେ କ୍ଷୋଭ ପ୍ରକାଶ କରିଥିଲେ। ଏହି ସମସ୍ୟାକୁ ଦୃଷ୍ଟି ଦେଇ ତୁରନ୍ତ ଏହାର ବିହିତ ବ୍ୟବସ୍ଥା କରିବା ପାଇଁ ଅଞ୍ଚଳବାସୀ ଦାବୀ ଜଣାଇଛନ୍ତି।
