ଏନଏଲସି କୋଇଲା ଖଣି ବିସ୍ଥାପିତ ଓ କ୍ଷତିଗ୍ରସ୍ତଙ୍କ ସମସ୍ୟାର ସମାଧାନ ପାଇଁ ଉପ-ଜିଲ୍ଲାପାଳ ଙ୍କ ଖଣି ଅଞ୍ଚଳ ପରିଦର୍ଶନ

ରେଙ୍ଗାଲି:ସମ୍ବଲପୁର ଜିଲା ଖିଣ୍ଡା ପଞ୍ଚାୟତରେ ସ୍ଥାପିତ ଏନଏଲସି କମ୍ପନୀ ର ତଲବିରା(୨) ଏବଂ (୩) କୋଇଲା ଖଣି ଯୋଗୁଁ ବିସ୍ଥାପିତ, ପ୍ରଭାବିତ ଏବଂ କ୍ଷତିଗ୍ରସ୍ତ ହୋଇଥିବା ଜନ ସାଧାରଣ ସମ୍ମୁଖୀନ ହେଉଥିବା ୧୧ ଦଫା ସମ୍ବଳିତ ବିଭିନ୍ନ ସମସ୍ୟାର ସମାଧାନ ନହେଲେ ଜନ ସାଧାରଣଙ୍କୁ ନେଇ ୨୦ ତାରିଖରୁ ଆନ୍ଦୋଳନ କରାଯିବ ବୋଲି ଖିଣ୍ଡା ସରପଞ୍ଚ ସନ୍ଧ୍ୟାରାଣି ପଧାନ ଜିଲାପାଳଙ୍କୁ ଦାବୀପତ୍ର ପ୍ରଦାନ କରିଥିଲେ। ଏହି ପରିପ୍ରେକ୍ଷୀରେ ଏନଏଲସି କୋଇଲା ଖଣି ବିସ୍ଥାପିତ ଓ କ୍ଷତିଗ୍ରସ୍ତଙ୍କ ସମସ୍ୟାର ସମାଧାନ ଏବଂ ସେମାନଙ୍କ ଦାବୀ ଗୁଡିକର କିଭଳି ସମଧାନ କରାଯିବ ସେ ସଂକ୍ରାନ୍ତରେ ଆଲୋଚନା କରିବାକୁ ଜିଲାପାଳ ଦିବ୍ୟଜେୟାତି ପରିଡାଙ୍କ ନିର୍ଦେଶ କ୍ରମେ ଆଜି ସଦର ଉପ-ଜିଲାପାଳ ସୂର୍ଯ୍ୟବଂଶୀ ମୟୁର ବିକାଶ ଏବଂ ରେଙ୍ଗାଲି ତହସିଲଦାର ଦମୟନ୍ତୀ ସାହୁ ତଲବିରା ଖଣି ପରିଦର୍ଶନ କରିଥିବାର ଜଣାପଡିଛି। ପରିଦର୍ଶନ ସମୟରେ କମ୍ପାନୀ ଅଧିକାରୀମାନେ ଉପସ୍ଥିତ ଥିବା ବେଳେ ଖିଣ୍ଡା ପଞ୍ଚାୟତର ସରପଞ୍ଚ ସନ୍ଧ୍ୟାରାଣୀ ପଧାନ, ନାଏବ ସରପଞ୍ଚ ଲାଲ ବୀରେନ୍ଦ୍ର ପ୍ରତାପ ସାଏ, ଭିଏସଏସ୍ ଶ୍ରମିକ ସଂଘର କାର୍ଯ୍ୟକାରୀ ସଭାପତି ବାବୁଲୁ ରାଉତ, ରୁ୍ଦ୍ର ପ୍ରଧାନ, ରୋହିତ ରାଉତ, ତରୁଣ ବୁଦ୍ଧିଆ, ଦେବେନ୍ଦ୍ର ବିଶ୍ୱାଳ, ସୁବ୍ରତ ବୁଦ୍ଧିଆ ପ୍ରମୁଖ ବହୁ ସ୍ଥାନୀୟ ବ୍ୟକ୍ତି ଉପ-ଜିଲାପାଳ ଏବଂ ତହସିଲଦାରଙ୍କୁ ସାକ୍ଷାତ କରି କମ୍ପାନୀର ମନମୁଖୀ କାର୍ଯ୍ୟ ଏବଂ ଜନସାଧାରଣଙ୍କ ଦାବୀ ସଂକ୍ରାନ୍ତରେ ଦୃଷ୍ଟି ଆକର୍ଷଣ କରିଥିଲେ।