ରାଜନଗର : ରାଜନଗର ବ୍ଲକ ସାନବଡଗୋପାଳପୁର ପଞ୍ଚାୟତର ସାନଓଲରା ଗ୍ରାମ। ଏହି ଗ୍ରାମରେ ୫୦ଟି ପରିବାରର ୫ ଶହରୁ ଊର୍ଦ୍ଧ୍ବ ଲୋକ ବସବାସ କରନ୍ତି। ଏହି ଗାଁରୁ ୧ କିଲୋମିଟର ଯିବା ପରେ ମୁଖ୍ୟ ରାସ୍ତା ପଡେ। ଏହି ଗୋଟିଏ କିଲୋମିଟର ରାସ୍ତାରୁ ଅଧେ କଚ୍ଚା ରାସ୍ତା ଥିବା ବେଳେ ଆଉ ଅର୍ଦ୍ଧେକ ପକ୍କାରାସ୍ତା କରାଯାଇଥିଲା। ସାନବଡଗୋପାଳପୁର ପଞ୍ଚାୟତର ଏକ ନମ୍ବର ୱାର୍ଡର ଦୁର୍ଦଶା କହିଲେ ନ ସରେ। ବର୍ଷାଦିନ ଆସିଲେ କଥା ସରିଲା। ଆମ୍ବୁଲାନ୍ସ ତ ଦୂରର କଥା, ସାଧାରଣ ଲୋକଟିଏ ଚାଲିକରି ଯିବା କାଠିକର ପାଠ। ଗାଁରେ କେହି ଅସୁସ୍ଥ ହେଲେ ସ୍ୱାସ୍ଥ୍ୟକେନ୍ଦ୍ରକୁ ନେବାକୁ ଏହି ଏକ କି.ମି. ରାସ୍ତା ସାଙ୍ଗିଭାରରେ ଯିବାକୁ ପଡ଼େ। ମୁଖ୍ୟରାସ୍ତା କଡ଼ରେ ରହିଛି ଓଲରା ପ୍ରାଥମିକ ବିଦ୍ୟାଳୟ ଓ କପିଳେଶ୍ୱର ଉ.ପ୍ରା. ବିଦ୍ୟାଳୟ। ଉଭୟ ବିଦ୍ୟାଳୟକୁ ଏହି ଗ୍ରାମର ପିଲାମାନେ ପାଠ ପଢିବାକୁ ପାଦଚଲା ରାସ୍ତାରେ ବହୁ କଷ୍ଟରେ ଯିବା ଆସିବା କରିଥାନ୍ତି। ବର୍ଷା ଦିନରେ ଅଭିଭାବକମାନେ ପିଲାଙ୍କୁ ଆଣି ବିଦ୍ୟାଳୟରେ ଛାଡଥାନ୍ତି ଓ ବିଦ୍ୟାଳୟ ଛୁଟି ପରେ ଘରକୁ ନେଇଥାନ୍ତି। ୨୦୧୧-୧୨ ମସିହାରେ ପଞ୍ଚାୟତ ସମିତି ପକ୍ଷରୁ ଗାଁ ପାଖରୁ ଅଧ କିଲୋମିଟର ପକ୍କା ରାସ୍ତା କରାଯାଇଥିଲା। ସେ ରାସ୍ତା ପୂର୍ବରୁ ଫାଟି ଯାଇଥିବା ବେଳେ ରାସ୍ତା ଉପରେ ଘାସ ଉଠି ବିପଦସଙ୍କୁଳ ପାଲଟିଛି। ଗ୍ରାମବାସୀ ବାରମ୍ବାର ରାଜନେତାଠାରୁ ଆରମ୍ଭ କରି ପ୍ରଶାସନକୁ ଅନୁରୋଧ କଲେ ମଧ୍ୟ କେହି ଶୁଣୁନଥିବା ନେଇ ଗ୍ରାମର ମୁରବି ରବିନାରାୟଣ ସ୍ୱାଇଁ, ଦୁର୍ଗାଚରଣ ସ୍ୱାଇଁ, ନରହରି ସ୍ୱାଇଁ, କୁଞ୍ଜବିହାରୀ ରାଉତ, କିଶୋର ରାଉତ, ବିଶ୍ୱନାଥ ରାଉତ, ସହଦେବ ରାଉତ, ଜଗନ୍ନାଥ ରାଉତ ପ୍ରମୁଖ ଅଭିଯୋଗ କରିଛନ୍ତି। ଏସଂପର୍କରେ କେନ୍ଦ୍ରାପଡା ଜିଲାପାଳ ଦୃଷ୍ଟିଦେବାକୁ ଗ୍ରାମବାସୀ ଦାବି କରିଛନ୍ତି।
Popular Categories
Previous article
Next article